Жетпіс жастағы Александр Холодяевты үйінен туған қызы қуып жіберген. Осылайша, зейнеткер үйін қызының атына сыйға жазып беріп, өзі далада қалды. Екі ұлы да әкесін қартайғанда керек қылмай отыр.
Ол суық күндері автотұрақтағы шағын үйшікті паналайды, сол жерде түнейді. Өйткені басқа барар жері жоқ.
«10 қыркүйек күні заттарымды шығарып тастады. Ол полицейлерге құжаттарды көрсетіп жатқанда, дымсыз қалған күйі орындықта отырдым. Ал кешке пәтерге басқа адамдар келді», – деп еске алады зейнеткер.
Astana.TV-ның жазуынша, төрт жыл бұрын әкесі кредитін жабу үшін қызынан көмек сұраған. Ал қызы оның орнына пәтерді сыйлық ретінде атына аударып беруді талап етті. Зейнеткер құжатқа қол қойған, алайда өзі дүниеден өткен соң ғана пәтерді қызының ала алатынын айтып барып келіскен. Бірақ қызы пәтерді 10 миллион теңгеге сатып жіберді. Қазір үйсіз жүрген зейнеткерді көршілері тамақтандырады.
«70 мың теңге зейнетақы алады, оның біразын кредит төлеуге жұмсайды. Біраз уақыттан бері төлеп келе жатқан кредиті бар. Енді міне, үйсіз қалып отыр. Балалары оны елемейді де. Ұлы оған қол көтерді», – дейді көршісі Фая Әубәкірова.
Полиция қыздың пәтерге иелік етуге әрі оны сатуға толық құқығы бар екенін айтса, құқық қорғаушылар зейнеткерге азаматтық сотқа жүгінуге кеңес берді.
«Ер адам пәтерді қызына сыйлық ретінде атына жазып берген, нотариуспен бекіткен. Соған байланысты қылмыстық іс бойынша іс жүргізу тоқтатылды», – деді Алматы полиция департаментінің өкілі Салтанат Әзірбек.
