Қазақстандағы қат мамандар кімдер?
Қазақстандағы қат мамандар кімдер?
242
оқылды

Биылғы үшінші тоқсанның қорытындысы бойынша электронды еңбек биржасындағы түйіндемелер мен бос жұмыс орны санының арақатынасы бойынша күзетшілер Қазақстандағы ең тапшы мамандардың көш басында тұр. Бұл жөнінде Еңбек ресурстарын дамыту орталығы хабарлады.

Орталық сарапшылары атап өткендей, осы жылдың 9 айының қорытындысы бойынша еңбек нарығында 3,3 мыңнан астам күзетші жұмыс орны бос қалған. Тапшы мамандардың үздік бестігіне тәрбиешілер (1,5 мыңнан астам бос орын), даяшылар (1,5 мың), сатушы-кассирлер (1,3 мың) және тәрбиеші көмекшілері (1,2 мың) кіреді. Ең сұранысқа ие мамандықтардың ондығына санитарлар, жүк көлігі жүргізушілері, орта мектеп мұғалімдері, жол жұмысшылары, сатушы-кеңесшілер кірді.

«Республика бойынша еңбек нарығындағы сұраныс айтарлықтай ерекшеленеді, ал күзетшілердің жалпы бос орындар санының үштен екісі 2 өңірге тиесілі екенін айта кету керек. Ол – Қостанай облысы (1050 бос жұмыс орны) және Нұр-Сұлтан қаласы (1034 бос жұмыс орны). Ал Шымкентте күзетшілер тапшы 25 мамандықтың тізіміне де енбей қалған. Еліміздің оңтүстік мегаполисінде ең сұранысқа ие мамандар – орта мектеп мұғалімдері (935 бос орын) болды»,- делінген хабарламада.