Есеп комитеті 2016 жылдан бастап 2020 жылғы қыркүйекке дейінгі аралықтағы қызметінің қорытындысын жариялады. Біраз қызық жайт анықталды.
«Республикалық бюджеттің атқарылуын бақылау жөніндегі есеп комитеті осы жылдары мемлекеттік бағдарламалардың іске асырылу, квазимемлекеттік сектордың, меморгандар қызметінің, Ұлттық банктің активтерін, мемлекеттік басқару органдарының халықаралық міндеттемелерді басқару тиімділігі сияқты әлеуметтік, экономикалық маңызды және тәуекелге бағдарланған бағыттар бойынша 98 (98 мың емес – авт.) аудиторлық іс-шараны жүзеге асырды», – деді ведомство.Есеп комитетінің ревизорлары 2016-2020 жылдары аудитпен шамамен 90 триллион теңге бюджет шығынын тексеріп шығыпты. Тексерулер қорытындысы бойынша 4 триллион теңгенің бұзушылығы анықталды. Соның ішінде 700 миллиард теңгесі – қаржылық бұзушылықтар. 374,4 млрд теңгенің бұзушылығы – бухгалтерлер еншісінде. Ең көбі – 2,5 триллион теңгені басшылар талан-тараж еткен. Комитет жалпы сомасы 452 миллиард теңгені ғана өндіріп, бюджетке қайтартты. Аталған мерзімде министрліктер мен әкімдіктерге Есеп комитеті 1 906 ұсыным мен тапсырма берді, оның 94%-ы орындалған.
Айхан ШӘРІП