Денсаулық сақтау министрлігінің Қоғамдық денсаулық сақтау ұлттық орталығы Дүниежүзілік сүт безі обыры туралы хабардар болу күні шеңберінде Қазақ Ұлттық қыздар педагогикалық университетінде онколог-маммолог мамандардың қатысуымен студенттерге тегін консультациялар беріліп, тексерулер жүргізілді. Іс-шараға белгілі қазақстандық дизайнер Құралай Нұрқаділова да қатысты.
Бұл күнді өткізудің мақсаты – студенттердің, болашақ аналардың осы аурудың алдын алу тәсілдері мен ерте анықтау туралы хабардар болуын жоғарылату.
Көшпелі медициналық тексеріс барысында онколог-мамолог дәрігер Закарья Олжас Мұратұлы қыз балалардың денсаулығын күту мен ауруды алдын-алу шараларының маңыздылығын айта отырып, сүт безі обыры ауруын ерте анықтауға арналған үй жағдайында тексерісті қалай және қаншалықты жиі жүргізудің тәсіліне кеңінен тоқталды.
Сондай-ақ, Құралай Заманбекқызы денсаулық сұрақтарына аса жауапкершілікпен қарайтынын айта отырып, жиналған жас буын өкілдеріне денсаулық мәселесіне қатысты ақпараттармен жиі танысып, салауатты өмір салтын ұстануға шақырды.
– Сән әлеміне келгелі бері мына жайтты байқадым: денсаулығына жауапкершілікпен қарайтын сау адам – ол сұлу адам. Өйткені «денсаулық» және «сұлулық» ұғымдары біртұтас. Бүгінгі көшпелі іс-шара үшін Қоғамдық денсаулық сақтау ұлттық орталығы мен Алматы қаласы Қоғамдық денсаулық басқармасына шынайы алғысымды білдіремін, өйткені мамандардың консультациялары мен медициналық қарап-тексеру аурулардың, әсіресе онкологиялық аурулардың алдын алып, оларды ескерту үшін маңызды. Бүгінгі мүмкіндікті пайдалана отырып, мен өз құрбы-құрдастарыма, сіңлілеріме – болашақ аналарға өз денсаулығын сақтауға кеңес берер едім, өйткені ананың денсаулығы – ол бүкіл ұлтымыздың денсаулығы, – деді Құралай Заманбекқызы.
Көшпелі медициналық тексеріс Алматы қаласы Қоғамдық денсаулық басқармасының қолдауымен жүзеге асырылып, шара аясында 200-ге жуық студент сүт безі обырын ерте анықтауға бағытталған профилактикалық тексерісті толықтай өтті. Ультра дыбыстық зерттеу, қан құрамын талдау және мамолог, терапевт дәрігердің кеңесі Университет қабырғасында жүргізілді.