Қазақстан мен Ресей Жайық өзені бойынша бірлескен комиссия құруға келісті. Бұл жаңалық Сенат төрағасы Д.Назарбаеваның Мәскеуге сапары аясында жария етілді. Дариға Нұрсұлтанқызы Ресей үкіметінің төрағасы Дмитрий Медведевпен кездесті.
«Горки» резиденциясында өткен жүздесуде олар мемлекеттеріміз арасында қарқынды саяси үнқатысу қалыптасқанын, экономикалық тығыз байланыс орнағанын, әр салада ынтымақтастық тиімді дамып келе жатқанын атап өтті. Өнеркәсіп кооперациясын ілгерілету, екі ел кәсіпорындарының бірлескен жобаларын іске асыру көзделіп отыр.
Келіссөз барысында Қазақстан азаматтарының Ресей аумағында жүріп-тұру жағдайларын құқықтық қамтамасыз ету, шекаралық өткізу бекеттерінің мәртебесін өзгерту, ортақ экологиялық кодекс әзірлеу, Қазақстан аумағындағы полигондардың экологиясы, сондай-ақ трансшекаралық өзендерді бөлу мәселелері қозғалды.
Д.Назарбаева қазақстандық көмірді Ресей мен Украинаға жеткізу мәселесін де көтерді. Оның айтуынша, жүкті Ресей аумағымен Украинаға жеткізуге шектеулер енгізілгелі бері, біріншіден, қазақстандық кәсіпорындар үшін украиналық нарық жабылды, екіншіден, Ресей нарығы айтарлықтай қысқарып қалды.
– Қазақстандық көмірді өткізетін басқа нарық жоқ. Бағаның құлдырауы мен көлік шығындарының өсуіне байланысты Еуропалық бағыт іс жүзінде тоқтады. Ресейлік шаралар біздің көмір өндіруші кәсіпорындарды осындай жағдайда тоқтаудың шегіне әкеліп отыр, – деді Сенат басшысы.
Өз кезегінде Дмитрий Медведев Қазақстан мен Ресей арасындағы байланыс ауқымдылығымен және тереңдігімен ерекшеленетінін айтты. Ресей премьері талқыланған барлық мәселелер бойынша тиісті тапсырмалар берілгеніне ерекше назар аудартты.
– Бүгін көтерілген мәселелер оң шешімін табады. Жайық өзені бойынша бірлескен комиссия құруға қажетті іс-қимылды жүзеге асыруды өз орынбасарым Алексей Гордеевке тапсырамын. Ортақ мәселелерді өзара тиімді жағдайда шешу қажет, – деді Д.Медведев.
Осы күні Әлемдік және дәстүрлі діндер лидерлері съезі хатшылығының басшысы ретінде Дариға Назарбаева Мәскеу және бүкіл Ресейдің қасиетті патриархы Кириллмен кездесті.
«Әлемдік және дәстүрлі діндер лидерлерінің IV съезіне сіздің қатысуыңыз форум жұмысына баға жетпес үлес қосты және оның мазмұнын айтарлықтай байыта түсті. Біздің ынтымақтастығымыз бен өзара қарым-қатынасымыз алдағы уақытта да елдеріміз арасындағы бейбітшілік пен келісімді нығайтуға ықпал етеді деп үміттенеміз» деген Д.Назарбаева патриархты 2021 жылдың маусым айында өтетін келесі форумға құрметті қонақ ретінде қатысуға шақырды.