19 тамызда Қызылорда қаласы Полиция басқармасының кезекші бөліміне Қорқыт ата көшесіндегі 4-қабаттағы пәтерлердің бірінен өрт шығып жатқаны туралы хабарлама түскен. Жедел қызметтерге хабар беріліп, аға учаскелік полиция инспекторы полиция майоры Мақсат Жылқайдаров оқиға орнына №2 УПП полиция инспекторлары полиция капитаны Мақсат Хасенов және полиция лейтенанты Бақытжан Досмағамбетовпен бірге дереу жетті. Бұл туралы Қызылорда облысы Полиция департаментінің баспасөз қызметі хабарлады.
Пәтерлердің бірінде олар қалың түтінді байқап, өрттің көрші пәтерлерге таралу қаупін сезіп, полицейлер Мақсат Хасенов пен Бақытжан Досмағамбетов басын сулы сүлгімен орап, өрт болған пәтердің есігін ашып, өртті сөндіруге кірісті.
Осы кезде үшінші қызметкер Мақсат Жылқайдаров өткір түтіннің салдарынан шыға алмайтын көрші пәтерлерден тұрғындарды шығара бастады. Айта кету керек, пәтерлердің төменгі қабатында ересектердің бақылауынсыз қалған балалар болған. Түтіннің әсерінен ештеңе көрінбей, жарық болмай, полиция қызметкері қараңғыда қолшаммен жылжып, адамдарды дереу көшеге шығарған.
Біраз уақыттан кейін өртті сөндіріп, батыл полицейлердің үйлесімді әрекеттерінің арқасында балалар мен ересектер қауіпсіз жерге шығарылды.
Жедел ақпарат бойынша, сол түні полиция жанып жатқан үйден шамамен 17 тұрғынды эвакуациялады.Үй тұрғындары құтқарушыларына алғыс білдірді.
«Біздің кейіпкерлеріміз туралы айтып кетсек. Шынында да күнделікті өмірде бұл керемет әкелер өздерінің батыл істерімен өсіп келе жатқан балаларына үлгі бола алады. Сол минуттарда олар өздеріне қауіп төнді деп ойламады. Олар нағыз батырлар сияқты басқаларды құтқара бастады. Себебі олар үшін ең бастысы және ең маңыздысы – адам өмірі.
Полиция майоры Мақсат Жылқайдаров, 37 жаста, ішкі істер органдарында 2008 жылдан бері қызмет атқарып келеді. Жұбайы – Айжан Алмағамбетовамен бірге 4 бала тәрбиелеп отыр. Ол спортты жақсы көреді.
Полиция капитаны Мақсат Хасенов, 33 жаста, ішкі істер органдарында 2013 жылдан бері қызмет атқарып келеді. Отбасылы, 2 бала тәрбиелеуде. Азаматтар және әріптестерімен қарым-қатынаста мәдениетті, ұстамды, мінезі салмақты, кішіпейіл. Өз дегеніне жетуге деген құштарлығы мол, іскер қызметкер.
Полиция лейтенанты Бақытжан Досмағамбетов 28 жаста, білімі жоғары заңгер, ішкі істер органдарында небәрі 1 жылдай қызмет атқарып келеді. Отбасылы, 2 бала тәрбиелеуде. Бұл азамат өздерін құқық қорғау саласында ерінбей еңбек етіп, жеке жұмыстарынан қызметтік міндетті жоғары қоятын еңбекқор қызметкер ретінде көрсете білді» дейді Қызылорда облысы Полиция департаментінің баспасөз қызметі.
Миуа БАЙНАЗАР