Пандемияға қарамастан, қазақтың ұлы ақыны, адамзаттың кемеңгері Абай Құнанбаевтың 175 жылдығын атап өту ісі халықаралық деңгейде өріс алуда. Неміс елінің астанасында «Абай үйі» ашылды.
Еліміздің Ақпарат және қоғамдық даму, Сыртқы істер министрліктерінің қолдауымен «Отандастар» қоры және «Дүниежүзі қазақтары қауымдастығы» халықаралық қоғамдық ұйымы Берлинде «Абай үйі» қазақ мәдени-іскерлік үйінің тұсаукесер салтанатын өткізді. Бұл нысанда енді Германиядағы қазақ диаспорасының мәдени, іскерлік және білім беру қызметін қолдауға бағытталған бірлескен жобаларды іске асыру мәселелері талқыланады деп күтілуде. Жалпы, шетелдегі диаспоралардың тарихи Отанға қуатты демеу мен көмек көрсете алатынын халықаралық тәжірибе көрсетіп отыр. Бұған мысалы, еврей және армян диаспораларының іс-қимылдары дәлел. Бұған дейін дәл осындай «Абай үйі» мәдени-іскерлік үйлері Ресейдің Омбысында, Өзбекстан астанасы Ташкентте және Түркияның бас қаласының бірі Стамбұлда ашылған болатын. Сонымен бірге «Отандастар» қоры алда өзге де елдерде «Абай үйі» мәдени-іскерлік үйлері желісін ашу ісін жалғастыруда. Іс-шараға Ақпарат және қоғамдық даму министрлігінің Этносаралық қатынастарды дамыту комитеті төрағасының орынбасары Еркін Үйсімбаев, СІМ Консулдық қызмет департаментінің қазақ диаспорасымен жұмыс басқармасының басшысы Мұхтар Кәрібай, Қазақстанның Германиядағы елшілігінің мәдениет жөніндегі атташесі Қуаныш Әмірғазиев, «Отандастар» қоры вице-президенті Мағауия Сарбасов, Германия-Қазақстан қоғамының директоры Галина Нұртазинова, Қазақстанның Баден-Вюртембергтегі құрметті консулы Доротея Халлер-Лейбле, Германиядағы қазақ қауымының өкілдері және жергілікті жұртшылық қатысты.Елдос СЕНБАЙ