Әл-Фараби атындағы Қазақ ұлттық университетінің журналистика факультетінде «Айқын» газетінің Алматы қаласындағы меншікті тілшісі, әріптесіміз Абай Аймағамбеттің «Бесінші жатақхана» атты кітабының тұсауы кесілді. Бесінші жатақхана деген атау бір Абай емес, қазақ журналистика саласында еңбек етіп жүрген көп әріптесімізге ыстық. Өйткені бұл – журфактың жатақханасы.
Абай бұл кітабында студенттік жылдардың жарқын естеліктерін майын тамыза жаза білген. Ол кейіпкерлерді де алыстан іздемепті. Олар – автордың құрдастары, студенттік жылдардың қызығы мен қиындығын бірге өткізген курстастары. Олар – қазір әлемнің түрлі айтулы университеттерінде білімін шыңдаған, журналистикада өз жолын таба білген жастар.
«Журналистика факультетінің 85 жылдығына орай белгілі журналистермен шеберлік сабақтарын өткізу, түлектермен кездесу және түлектердің шығармашылығымен таныстыру сияқты түрлі шара ұйымдастырылып келеді. Бүгінгі шара өз түлегіміз Абай Аймағамбеттің «Бесінші жатақхана» кітабының тұсаукесері – осы игі істердің жалғасы. Абайдың қаламы жүйрік екен. Тілі майда, ойы ұшқыр. Кітапта ойдан құрастырып ештеңе айтпаған. Өз көзімен көрген, тіпті бастан кешкен оқиғаларды мәнді, маңызды жайттарды әдемі жеткізе білген. Абайдың қаламгерлік қарымы қатая берсін!» деген Журналистика факультетінің деканы, филология ғылымдарының кандидаты Сағатбек Медеубекұлы оған сәттілік тіледі.
Жиынға факультеттің ұстаздары, студенттер мен кітап авторының курстарстары, анығын айтқанда осы кітаптың нағыз кейіпкерлері қатысып, игі тілектерін арнады.
Абай осы кітап арқылы журналистика факультетіне, өз құрбы-құрдастарына үлкен ескерткіш жасады. Осыған дейін ара-тұра әлеуметтік желілерде жариялап жүрген естеліктері енді тұтас бір жинаққа айналды. Тасқа басылған ой, қызықты сәттер ешқашан ұмытылмайды. Өкшемізді басып келе жатқан кейінгі толқын кітапты оқи отырып ой түйеді, өмірлік сабақ алады. Тілі жеңіл, оқиғасы түрлі қызыққа толы кітап оқырман қауымның көңілінен шығады деген сенімдеміз.
Гүлнар ТӘЖИЕВА