Айсамал Сансызбаева ауыр атлетикадан әлем кубогінің жеңімпазы атанды.
Перудің Лима қаласында Перу ауыр атлетика федерациясының ұйымдастыруымен онлайн әлем кубогі өтіп жатыр. Жарыстың кезекті күнінде қыздар арасында 81 келіден жоғары салмақта қазақстандық спортшы үздік деп танылды. Айсамал Сансызбаева қос сайыс нәтижесі бойынша 244 келіні бағындырып, Қазақстан қоржынына кезекті алтынды салды деп жазады Olympic.kz. Жастар арасында алғашқы жарысына қатысқан тағы бір қазақстандық Жанәли Тұяқов үшінші орыннан көрінді. Ол ерлер арасында 102 келіден жоғары салмақ дәрежесінде бақ сынап, қос сайыс нәтижесі бойынша 319 (140+179) келіні көтерді. Осылайша, Қазақстан қоржыны тағы бір алтын, бір қола жүлдемен толықты. Осыған дейін Абылай Әуелханов пен Рахат Бекболат алтын алса, Гүлнұр Ыбырай қола жүлдеге қол жеткізген болатын.
