Грекия астанасы Афины қаласындағы Эпиграфиялық музейде «Ұлы дала: тарих және мәдениет» көрмесі ашылды. «Алтын адамның әлем музейлеріне шеруі» халықаралық көрме жобасы аясында басталған іс-шара 2019 жылғы 11 қарашадан 11 желтоқсанға дейін жалғасады.
Іс-шараның мақсаты – Қазақстанның тарихи-мәдени бай мұрасымен шетелдік көрерменді таныстыру. Көрменің ашылуы қарсаңында Афины қаласындағы Эпиграфиялық музейде жергілікті бұқаралық ақпарат құралдары өкілдерімен баспасөз мәслихаты өтті. Шараға Қазақстанның Грекиядағы елшісі Алексей Волков, Ежелгі және мәдени мұраның бас директоры Поликсени Адам-Велени, Афиныдағы Эпиграфиялық музейдің директоры Атанассиос Темос, Қазақстан Республикасы Ұлттық музей директорының орынбасары Алмаз Нұразхан, тарих ғылымының докторы, профессор Зайнолла Самашев қатысты.
Ашылу салтанатында сөз алған Ұлттық музей директорының орынбасары Алмаз Нұразхан көрмеге келген меймандарға «Алтын адам» туралы кеңінен әңгімелеп берді.
«Алтын адамның» әлем музейлеріне шеруі» көрмелік жобасы әлемді аралап келеді. Грекия – Қазақстанның тарихи-танымдық көрмесін тамашалап отырған он екінші мемлекет. Бүгінге дейін Қазақстанның өңірінен табылған алтын адамдар – еліміздің ерте дәуірдегі мәдениетін, тарихын айқындайтын ұлттық құндылық. Көрме жұмыстарына қолдау білдіргені үшін Грекияның Мәдениет министрлігіне, Афины қаласының Эпиграфиялық музейінің басшылығы мен қызметкерлеріне алғысымды білдіремін» деді А.Нұразхан.
Афины эпиграфиялық музейіндегі көрмеден «Алтын адамның» реконструкциясын және ақсүйек сақ жауынгерімен бірге жерленген ерте темір ғасырының археологиялық олжаларының коллекциясын тамашалауға болады.
Көрмеде сол сияқты Тақсай (Батыс Қазақстан облысы), Талды-2 (Қарағанды облысы) және Берел (Шығыс Қазақстан облысы) сияқты сақ қорғандарынан табылған археологиялық бірегей олжалар да көрсетілді.
Көрмеге Қазақстан Республикасы Ұлттық музейінің қорларынан барлығы 144 зат ұсынылды. Көрмеге қойылған Қазақстанның ежелгі және ортағасырлық өнерінің жауһарлары – Еуразия дала мәдениеті мұрасының өзіндік ерекшелігін көрсететін бұрынғының атаусыз шеберлері туындыларының аз ғана бөлігі.
Сондай-ақ шара барысында Зайнолла Самашев «Ежелгі сақтардың Қазақстандағы мәдени кешені» атты дәріс оқыды.
Ақбота ӘЛІМ