Түркістан облысының аудан, қалаларында «Елбасы және Қазақстан» тақырыбында кітап көрмесі ұйымдастырылды.
«Nur Otan» партиясы Бәйдібек аудандық филиалының ұйымдастыруымен де «Тұңғыш Президент – дәуір адамы» атты іс-шара өтті. Отырар ауданындағы кітап көрмесі де жоғары деңгейде ұйымдастырылды. Онда «Сындарлы он жыл», «Қазақстан жолы», «Елмен сырласу», «Ой бөлістім халқыммен», «Тәуелсіздік дәуірі» сынды Елбасының тәуелсіздік жылдарындағы жүріп өткен жолы, жетістіктері жайлы еңбектерімен қатар Елбасы туралы кітаптар оқырман назарына ұсынылды. Ал Ордабасы аудандық орталық кітапханасында өткен көрмеге Елбасының тәуелсіздік жылдарындағы жүріп өткен жолы, жетістіктері жайлы еңбектерімен қоса, Тұңғыш Президент туралы М.Қасымбековтің «Елін сүйген, елі сүйген Елбасы», Б.Сапаралының «Тұңғыш Президенттің балалық шағы», А.Гафоровтың «Еліне елеулі Елбасы: Н.Назарбаев – саясат майданының қайраткері», А.Сәулебектің «Елбасының алтын бесігі» және тағы басқа да авторлардың кітаптары, сондай-ақ Елбасының іссапардағы, отбасылық естелік суреттері, жеке заттары оқырмандар назарына ұсынылды. Оқырмандар Елбасының балалық шағынан бастап, бүгінгі ерен еңбектері жөнінде жан-жақты қамтылған туындылармен танысып, жас ақындар Елбасыға арнаған өлеңдерін оқыды. Дәл осындай іс-шара Түлкібас ауданында да жалғасын тапты. Аудандық орталықтандырылған кітапханада «Еліне тұтқа болған Елбасы» атты мерекелік іс-шара ұйымдастырылды. Жиында «Еліне тұтқа болған Елбасы» атты кітап көрмесі, құнды құжаттар мен Елбасы өмірінің әр кезеңінен дерек беретін фотоматериалдардың таныстырылымы өтті. Партия көшбасшысының өмірі мен елге сіңірген ерен еңбегін насихаттайтын бірқатар кітаптар жеке-жеке таныстырылды. Сондай-ақ Нұрсұлтан Назарбаевтың өзі жазған еңбектер мен «Елбасы сүйген Оңтүстік» атты кітап оқырман назарына ұсынылды. Іс-шара барысында аудан өнерпаздары «Арша» триосының әншілері музыкалық аспаптардың сүйемелдеуімен «Үшқоңыр» әнін шырқады. Шараға келген қонақтар Елбасының нағыз көшбасшы екенін жеткізіп, алғыс білдірді.Әбілмансұр ЖАСАН