Алматы қаласының әкімі Бақытжан Сағынтаев Мемлекет басшысының Жолдауы аясындағы өңірдің дамуы туралы Президент жанындағы ОКҚ-да брифинг өткізді.
«Мемлекет басшысы әлеуметтік-экономикалық тұрақтылықты, жұмыс орындары мен халықтың табысын сақтап қалу мақсатында пандемияны жеңіп шығу және дағдарысқа қарсы шаралар бойынша нақты міндеттер қойды. Сондықтан ел Президентінің Жолдауын орындау үшін Алматы қаласы әкімдігінің 2020 жылғы басты міндеті – қала тұрғындарын коронавирус пандемиясынан қорғау және әлеуметтік-экономикалық тұрақтылық болды», – деді Алматы қаласы әкімі. Шаһар басшысы пандемия басталғаннан бері қалада індет жұқтырудың 16 534 жағдайы (100 мың тұрғынға есептегенде 828,13), сондай-ақ этиологиясы анықталмаған пневмонияның 1 200 жағдайы тіркелгенін айтты. Оның 14 960-ы немесе 90,4%-ы жазылып шықты. Коронавирустан қайтыс болғандар саны – 331 адам (2%). Биыл COVID-19-ға қарсы күрес үшін Алматыға республикалық (21,6 млрд теңге) және жергілікті (89,4 млрд теңге) бюджеттен барлығы 100 млрд теңгеден астам қаражат бөлінді. Қала әкімінің хабарлауынша, Мемлекет басшысының тапсырмасына сәйкес, шаһар тұрғындарының жұмыс орны мен кірістерін сақтау мақсатында қала экономикасының төмендеуін болдырмау бойынша шара қабылданған. Өнеркәсіп, байланыс, құрылыс салаларында экономикалық өсім сақталған. Мысалы, өнеркәсіп – 4,3%-ға, құрылыс – 11,8%-ға, пайдалануға берілетін баспана көлемі – 3,6%-ға, байланыс қызметтері 8%-ға өсті. 2020 жылы мегаполистің негізгі капиталына 719,2 млрд теңге инвестицияланды, оның басым бөлігі жеке инвесторлардың қаражаты. Шаһарда көпбалалы аналарға қолдау көрсету үшін өңірлік «Бақытты отбасы» орталықтарының базасында «Іскер Ана» бағдарламасы іске асырылуда. Мұнда оларды «Еңбек» мемлекеттік бағдарламасы аясында кәсіпкерлік негіздеріне оқытады. Көпбалалы отбасылардан 888 адам 555 мың теңгеге дейін грант алды. Сонымен қатар 406 млн теңге сомасына 203 көпбалалы ана 5 млн теңгеге дейінгі грантты иеленді. «Шыңға өрлеу» әлеуметтік клубы жобасы іске қосылды. Сондай-ақ мүгедек жандарды әлеуметтендіру және жұмысқа орналастыру мақсатында алғаш рет Ten Qogam әлеуметтік қолдау орталығы ашылды. Журналистердің сұрағына жауап беру барысында Алматы қаласының әкімі Бақытжан Сағынтаев бірнеше жылдан бері қаралып келе жатқан иесіз электр желілері мәселесін шешу бойынша жүргізіліп жатқан жұмыстар туралы айтты. 2019 жылы 6 аудандағы иесіз электр желілерінің 170 нысаны қаланың коммуналдық меншігіне алынған еді. Бүгінде қаланың 7 ауданында иесіз инженерлік желілердің 450 нысаны анықталды. Оларға қатысты одан әрі қызмет көрсету үшін қаланың коммуналдық меншігіне беру туралы соттың оң шешімі бар. Алматы қаласы әкімдігінің қаулысымен 129 электр желісі «Алатау Жарық Компаниясы» АҚ-ға тегін берілді. Алматылықтар үшін басты мәселенің бірі – экология. ЖЭО-2-ні жаңартуға байланысты ұзақ жылдардан бері айтылып келе жатқан мәселеге қатысты орталықты толығымен газға көшіру туралы оң шешім қабылданды. Экологияға байланысты екінші маңызды мәселе – жеке секторды газбен қамтамасыз ету. Өткен жылы қала тұрғындарының 99%-ын газбен қамтамасыз етуге қол жеткізілді. Бүгінде 1 840 үй газға қосылмаған. Жасыл қорды ұлғайту бойынша ауқымды жұмыстар жүргізілуде. 1 млн ағаш отырғызу бойынша 3 жылдық «Жасыл Алматы» қалалық бағдарламасы қабылданды. Өткен жылы 130 мың көшет, биыл 250 мың жасыл желек отырғызылды. Таяуда Sulpak сауда орталығы маңынан бір түнде 13 ағаштың оталып, қала белсенділерінің наразылығын тудырғанынан көпшілік хабардар. Бұл мәселеге Мемлекет басшысы Қасым-Жомарт Тоқаев та назар аударып, Алматы қаласы әкіміне қалада ағаштардың заңсыз оталуына байланысты қызметтік тексеруді тапсырған болатын. Қала әкімі Б.Сағынтаев: «Әкімшілік, жалпы халық қаланы көгалдандырып, Алматыны бұрынғы жасыл қала атағына қайта келтіру жұмыстары жүргізіліп жатқан кезде кейбір жауапсыз кәсіпкерлердің түнделетіп ағаштарды отап жатқаны әкімшілік қызметкерлерін ғана емес, жалпы елдегі азаматтардың бәрінің ашу-ызасын тудырды. Бұл, әрине қынжылатындай жағдай. Әкімдіктің ұстанымы – азаматтық қоғамның белсенді қатысуымен мегаполистің экологиялық проблемаларын бірлесе шешу. Біз бұл бағытта бірге жұмыс істейтін боламыз» деп тоқталып өтті. Қала әкімі брифингінде, сондай-ақ тұрғын үй құрылысы, азық-түлік қауіпсіздігін қамтамасыз ету және бағаның өсуін тежеу, мектептер мен балабақшалардағы орын тапшылығы мәселесін шешу, қаланы жарықтандыру жайы да сөз болды.Гүлнар ЖҰМАБАЙҚЫЗЫ