Алдағы жылдары ауылда бұқаралық спорттың дамуына соны серпін берілмек. Мемлекет басшысы биылғы Жолдауында бұқаралық спортқа және дене тәрбиесіне басымдық беру қажет екенін ерекше атап өткені мәлім. Осы орайда, Сенат Спикері Мәулен Әшімбаевтың төрағалығымен өткен палата отырысында сенаторлар заңнамаға мәдениет, денешынықтыру және спорт мәселелері бойынша түзетулер енгізетін заңды қабылдады.
– Бұл заң балалардың жан-жақты дамуына ықпал ететін спорт және шығармашылық бағыттағы мемлекеттік тапсырыстарды тиімді ұйымдастыруға мүмкіндік береді. Бұдан былай мемлекет қаржыландыратын спорттық және шығармашылық үйірмелер мемлекеттік сатып алу қорытындысына қарай емес, спорттың өзінің рейтингіне, сондай-ақ оған деген халықтың сұранысына қарай анықталады. Осы заңға мүмкіндігі шектеулі жандар үшін тұрғылықты жерде және демалыс орындарында спортпен шұғылдануға жағдай жасау нормалары да енгізілді. Соған сәйкес бұл жұмыс енді жергілікті атқарушы органдардың міндеті болып есептеледі. Сонымен қатар бұл құжатта ұлттық спорт түрлерін дамыту, оларды жас буынға мектеп кезінен бастап насихаттау мәселелеріне ерекше назар аударылған, – деді Мәулен Әшімбаев. Отырыс кезінде сенаторлар «Техникалық реттеу туралы» заңды қабылдады. Бұл құжат отандық тауар өндірушілердің бәсекелестік басымдығын іске асыруға арналған. Сондай-ақ депутаттар «Техникалық реттеу, кәсіпкерлік, мемлекеттік басқару жүйесін жетілдіру және төлемдер мәселелері бойынша кейбір заңнамалық актілерге өзгерістер мен толықтырулар енгізу туралы» заңды бірден екі оқылымда қарап, құптады. –Ішкі нарықтың қауіпсіздігін қамтамасыз ету үшін ұлттық сертификаттау жүйесін дамыту қажет. Ұлттық стандарттардың беделі мен оларға деген сенімді арттыру мәселесі маңызды. Бүгін қабылданған заңдар осы мақсаттарды жүзеге асыруға бағытталған. Олар техникалық реттеу саласындағы бақылау-қадағалау қызметінің ашықтығы мен тиімділігін қамтамасыз етеді. Сол арқылы өнімнің тиісті сапасына және оның тұтынушылар үшін қауіпсіз болуына ықпал етеді, – деді Сенат Төрағасы. Бұдан бөлек, жоғарғы палата депутаттары «Кедендік реттеу және кәсіпкерлік қызмет мәселелері бойынша кейбір заңнамалық актілерге өзгерістер мен толықтырулар енгізу туралы» заңды да екі оқылымда қабылдады. Бұл заңға депутаттар бастамашы болған. Спикердің айтуынша, бұл заң кедендік рәсімдерді өткізу мерзімдері мен тәртібін оңтайландыруға, кедендік реттеуді жетілдіруге және бизнес ахуалды жақсартуға бағытталған. «Осы заң адамның қатысуын барынша азайтып, сыбайлас жемқорлық тәуекелдерін төмендетуге және құжат айналымын азайту үшін кедендік ақпараттық базаның қызметі мен «Бірыңғай терезе» жүйесін жетілдіруге мүмкіндік береді. Сондай-ақ сыртқы экономикалық қызметке қатысушылардың өтініштерін қарау және сол бойынша шешім қабылдау мерзімдерін қысқартуға жағдай жасайды. Сонымен қатар камералық және көшпелі кедендік тексеріс жүргізу рәсімі қайта қаралады. Алдағы уақытта заң кедендік реттеуді жетілдіруге үлесін қосады деп сенеміз», – деді М.Әшімбаев. Сонымен қатар сенаторлар арабтармен елшілік салу үшін жер алмасуға мүмкіндік беретін құжатты – «Қазақстанның БАӘ-дегі елшілігінің және БАӘ-нің Қазақстандағы елшілігінің қажеттіліктеріне Астана қаласында және Әбу Даби қаласында жер учаскелерін өтеусіз пайдалануға өзара беру туралы келісімді» ратификациялады.Елдос СЕНБАЙ