Сырым ауданына қарасты Бұлдырты ауылдық округі – Батыс Қазақстан облысы бойынша іргелі ауылдың бірі. 545 түтіні, 3 000-нан астам тұрғыны бар үшбу мекеннің жастары спортқа бейім. Олар әсіресе еркін күрес пен қол күреске құмар. «Талпынған жетер мұратқа» дегендей, бұлдыртылық жастардың алды бүгіндері ел біріншілігін былай қойып, Азия құрлығы мен дүниежүзілік додалардан да олжалы оралып жүр.
Мәселен, еркін күрестен елімізге еңбегі сіңген спорт шебері, Азия және Әлем чемпионатының күміс жүлдегері Нұрлан Бекжанов – бүгінде туған ауылымен қоса, Сырым ауданы мен біздің облыстың ортақ мақтанышы. Осыдан бірер апта бұрын мәреге жеткен еркін күрестен Қазақстанның биылғы чемпионатында 74 келі салмақ дәрежесі бойынша Бахыттың Нұрланы ел чемпионы атанып, өзінің бабында екенін тағы бір дәлелдеді. Ендігі мақсат – ақпан айында өтетін Азия чемпионатында алтыннан алқа тағып, құрлық бойынша ешкімге дес бермеу. Міне, осындай жағдайда Нұрлан баһадүрге келер жылы Жапонияның астанасы Токиода өтетін жазғы Олимпиадаға қатысуға жол ашылары анық. Өйткені бұл салмақ бойынша осыдан бірер ай бұрын Астанада өткен Әлем чемпионатында Қазақстан құрамасы олимпиадалық лицензияға қол жеткізді. Кезінде Нұрландай дарынды шәкіртін күрес әлеміне жетелеген Қазақстанның еңбек сіңірген бапкері Асқар Сәукелиннің Бұлдыртыдағы іргелі ісін қазір Нұрланның туған ағасы Руслан Бекжанов (суретте) жалғастыруда. Ол Сырым аудандық балалар мен жасөспірімдер спорт мектебі Бұлдырты филиалының бапкері ретінде 60 өренді еркін күрестің қыр-сырына баулып жүр.
Ауыл бапкерінің үш шәкірті бүгінде Нұр-Сұлтан қаласында Қажымұқан атындағы спорт колледжінде тәлім алып жатыр. Ең бастысы, Руслан Бахытұлының біраз шәкірті қазірдің өзінде айта жүретіндей белестерді еңсеріп үлгерді. Нұржан Исағалиев еркін күрестен еліміздің 2018, 2019 жылдардағы екі дүркін чемпионы атанса, Назерке Оңдағанова кадеттер арасында Қазақстан чемпионы, Гүлдерайым Тыныбекова Қазақстан чемпионатының жастар арасында үш мәрте қола жүлдегері, ал Қазбек Бахытов республикалық және халықаралық жарыстардың бірнеше дүркін жеңімпазы болды. Осындай қырандарды қанаттандырып, биіктерге самғатып жүрген бапкер жылына он шақты спорт шеберлігіне үміткерді даярлайды екен. Жақында Бұлдыртыдан шыққан чемпиондар ұшатын ұяны, яғни спортзалды көріп, жағамызды ұстадық. Бұлдырты жалпы орта білім беретін мектебіне қарасты интернаттың жертөлесін спорттық зал деу қиын. Тап-тар әрі ауасы да тымырсық.
– Біздің ауылда салынуы тиіс денешынықтыру-сауықтыру кешенінің 3 миллион теңгеге жобалық-сметалық құжаты жасалғанына екі жылдан асып барады. Мұндай құжат тек үш жыл ғана жарамды екен. Демек, келесі жылы кешен салынбаса, 3 миллион теңге текке күйіп кетеді, – деп уайымдайды Руслан Бекжанов. Бұл мәселеге қол күрес бапкері Төлеген Құрашев та пікір қосты.
– Екі жылдан бері армрестлинг үйірмесін жүргіземін. Спорттың бұл түріне ұл балалардың да, қыз балалардың да құлшынысы күшті. Биылғы оқу жылында қол күресі үйірмесіне 32 оқушы жүйелі түрде қатысып жүр. Екі жылдың ішінде 13 спорт шеберлігіне үміткерді даярладым. Егер жағдай болса, осы көрсеткіштің өзін көбейтуге болады. Бірақ ол үшін заман талабына лайық спорттық кешен керек. Әзірге ұл-қыздарымыз тап-тар әрі аласа жертөленің қуықтай бөлмесінде жаттығуға мәжбүр. Соның өзінде шәкірттерім жақсы нәтижелер көрсетіп жүр. Мысалы, биылғы Қазақстан чемпионатында Ерсұлтан Талғатов деген шәкіртім қола жүлдені иеленді. Ділнәз Әбунағымова мен Ұлпан Ихсанова осыдан бір ай бұрын Алматыда өткен Азияның ашық кубогына қатысып, екеуі де қола жүлдегер атанды, – дейді бапкер.
– Бұл мәселе бапкерлер мен балаларды ғана емес, ата-аналарды да толғандырады. Ауылдық жердегі спорт кешеніне мемлекеттік-жекеменшік әріптестік формуласы бойынша инвестор табу қиын болып тұр, – дейді Бұлдырты ауылдық округінің әкімі Ерлан Мақашев.
Ендеше, Бұлдырты ауылының үлкен-кішісін бірдей мазалайтын шаруа аудан, облыс басшылығы тарапынан түсіністік тауып, оңтайлы шешілер деген үміттеміз. Әйтеуір, болашақ денешынықтыру-сауықтыру кешенінің жобалық-сметалық құжатын жасақтауға кеткен 3 млн теңге желге ұшпаса екен.
Бауыржан ҒҰБАЙДУЛЛИН,
Батыс Қазақстан облысы