Роза – шетелде өнер көрсетіп, қазақ елін танытқан әнші. Роза – өзінің ерекше дауысымен миллиардтарды мойындатқан дара тұлға. Роза – Кеңес Одағының және қазақ эстрадасының тірі аңызы.
Өзінің нәзік болмысымен, табиғи талантымен талайдың таңдайында жүрген өнер иесінің еңбегі қалай еленсе де артық емес. Оның орындаған әндері отандық музыка өнерінің алтын қорын толықтырды.
Күні кеше Президент Қасым-Жомарт Тоқаевтың Жарлығымен ұлттық мәдениетті дамытуға қосқан үлесі үшін Роза Рымбаева «Қазақстанның Еңбек Ері» атағымен: «Алтын Жұлдыз» және «Отан» орденімен марапатталды. Бұл – Розаға тектілігі мен өнерге адалдығының арқасында келген үлкен жеңіс. Иә, ол үшін ұсақ-түйек ештеңе жоқ. Сахнада жүргеніне 40 жылдан асса да өзін үлкен емтихан алдында тұрғандай сезінетін жауапкершілігі әншіні осындай биікке көтерді. Бұл жаңалық қалың қазақ даласына жылы желдей есіп, қуанбаған адам қалмады.
Өйткені өзіндегі барды өнердің мейрамына айналдырған дарынды әншіні қалың елі қашанда мақтан тұтады. Мыңнан бірге берілген, Розаның маңдайына жазылған бақ бұл! Құтты болсын!