Мәжіліс депутаттары Аманжан Жамалов, Снежана Имашева, Шавхат Өтемісов Батыс Қазақстан облысының Орал қаласындағы дарынды балаларға арналған мамандандырылған мектеп-интернатына барып, аталған мекеменің ұжымымен және оқушылармен кездесті.
Айта кетейік, аталған спорттық мекеме 250 оқушыға арналған және оның ішінде 150 балаға интернат қарастырылған. Кешен ғимараты 3 спорт залынан және қызмет көрсететін персонал блогынан тұрады. Оқушылар жалпы дайындық спорт залында, күреспен айналысуға арналған спорт залында, волейбол, баскетбол, гандболға арналған спорт залында спортпен шұғылданады.
Білім ордасында өзара вестибюль қосылған 3 блок бар. Мектепке 7 сыныптан бастап қабылдайды. Ал сыныптағы оқушылардың саны – 24. Мәжіліс залы 125 орынға есептелген.
– Талантты жастардың оқудан тыс спортпен шұғылдануына, олардың қабілеттерін шыңдауға, спортшы ретінде өсіп-жетілу үшін бұл керемет орталық деп есептеймін. Жалпы, елімізде спортқа үлкен көңіл бөлініп жатқаны барлығымызға белгілі. Нұр-Сұлтан, Алматы және өзге де облыстарда осындай орталықтар ашылып жатыр. Елбасы Нұрсұлтан Назарбаев 1-2 жыл ішінде елімізде 100 спорт кешенін салу туралы тапсырма берген болатын. Осыған орай, бүгінде облысымызда Жәнібек ауданында үлкен спорт кешенінің құрылысы жүргізіліп жатыр. Ал Жаңақала ауданында спорттық кешеннің құрылысы аяқталса, Ақжайық ауданында құрылыс келесі жылға жоспарланды, – деп атап өтті Мәжіліс депутаты Шавхат Өтемісов.
Депутаттардың айтуынша, елімізде ұстаздардың мәртебесі туралы заң қабылданды. Аталған заңда ұстаздардың мәртебесін көтеру, оларға барлық жағдайды жасау үшін көптеген мәселе қарастырылған. Егер ұстаздың дайындаған шәкірті халықаралық, республикалық деңгейдегі байқауларда жақсы жетістікке жетіп, жеңімпаз атанатын болса, ұстаздың жалақысы да 2-3 есе өседі. Бұл ұстаздар үшін де үлкен мотивация болмақ.
Басқосу барысында мектеп-интернаттың алдағы жоспары баяндалып, жаңартылған білім беру жүйесінің кейбір талаптарының ауыл мектептеріне келмейтіні, «Педагог мәртебесі» туралы заңның артықшылығы, сондай-ақ ұстаздар мен оқушыларға қолдау білдіру бағытындағы бастамалар талқыға түсті.
Әбілмансұр ЖАСАН