Көкшетау қаласында ерекше қажеттіліктері бар жандар қоғамдық көлікте тегін жүруі үшін «Nur Otan» партиясына өтінішін жеткізді. Есту және көру қабілетінен айырылған мүгедектерді біріктіретін қоғамдастық жетекшілері бірнеше жылдан бері Көкшетау қалалық әкімдігінің есігін тоздырып, қалалық мәслихат пен қала әкімінің қаулысына енген 15 санатқа өзгерту енгізуді сұрап отыр.
– Көкшетау қаласы әкімінің 2019 жылғы қаулысына сәйкес, қоғамдық көлікте белгіленген 15 санат бойынша ғана азаматтар тегін жүруге құқылы. Алайда бұл санатқа есту қабілеті және көзі нашар көретін ІІ топ мүгедектігі бар азаматтар енбеген. Тек жәрдемақымен ғана жан бағып отырған жандар үшін қоғамдық көлікте тегін жүру көп көмек болар еді, – дейді мүгедектердің шағымын жеткізген қоғамдастық жетекшілері. Партия филиалына жиналған Ақмола облыстық қазақ соқырлар қоғамының өкілдері көру қабілетінен айырылған ІІ топтағы мүгедектер қала ішінде қоғамдық көліктерде ақысыз жүру туралы өтініштерін қарастыруды сұраса, ал облыстық саңыраулар қауымдастығы есту қабілетінен айырылған мүгедектігі бар барлық азаматты қоғамдық көлікте тегін жүргізуді сұрады. Көмек сұрап отырған кембағал жандардың саны 200-ден асады. «Nur Otan» партиясы облыстық филиалы төрағасының бірінші орынбасары Ғалым Бекмағамбетов мәселенің мән-жайын тыңдап, автобус паркінің басшылары, қалалық мәслихат депутаттары мен жергілікті атқарушы орган өкілдеріне алдағы бір апта ішінде 200-ден астам көру және есту қабілетінен айырылған мүгедек жандардың қала автобустарында тегін жүруін заң аясында қарастырып, мүгедек азаматтарға көмек көрсетуді тапсырды.Әбілмансұр ЖАСАН