Қатты соққыдан көліктің сау-тамтығы қалмаған.
Шығыс Қазақстан облысында Қалбатау – Көкпекті бағытындағы тасжолда "Лада" мен "Тойота Хайландер" автокөлігі бетпе-бет соғылып, төрт адам қаза тапты.
«Соққының қатты болғаны соншалық, "Ладаның" сау-тамтығы қалмаған. Оның ішіндегі жүргізуші мен үш жолаушы алған жарақатынан оқиға орнында жан тапсырды», деп хабарлады КТК.
Ал "Тойотадағы" төрт адам түрлі жарақаттармен ауруханаға жеткізілген. Оның екеуі кәмелетке толмаған балалар.
Қазір полицейлер оқиғаның мән-жайын анықтап жатыр.
Айта кетейік, синоптиктердің болжамынша, демалыс күндері солтүстік және шығыс облыстарда бұрқасындатып, қар жауады, оңтүстік өңірлерде жабысқақ қар жауады.
Күндіз ауа температурасы 0, -8°С, оңтүстікте +3…-5°С шамасында болғандықтан, Қазақстан аумағының басым бөлігінде көктайғақ және көру қашықтығы 500 метрден төмен тұман сақталады.