Ұлттық құндылықты дәріптеу – парыз. Оның ішінде салт-дәстүрді, ел ішінде ғана емес, әлемдік аренаға алып шығу маңызды. Көкпар, ат жарысы, садақ ату, сонымен қатар күрес дегенде делебесі қозбайтын қазақ жоқ екені сөзсіз. Грекия 2021 жылы Қазақ күресінен Әлем чемпионатын өткізуге ниет білдіріп отыр. Ол жерде де ұятқа қалмауымыз керек. Міне, енді сол қазақ күресі академиясы ашылуы жоспарда бар деген сөзді естіп қуанып қалғанымыз да бар! Өйткені Қажымұқандай жауырыны жерге тимеген балуандарды даярлау үшін мамандарды даярлайтын орталық керек-ақ
Бұл туралы ОКҚ-да өткен баспасөз мәслихатында Қазақ күресі федерациясының президенті – Ақпарат және қоғамдық даму министрі Дәурен Абаев жиналған қауымға жеткізді. «Бұл неден туындады?» деген сұрақ көкейге келді. Айта кетейік, бұдан 3 жыл бұрын қазақ күресін дамытудың 2016-2021 жылдары дамыту стратегиясында 2020 жылы қазақ күресін мектеп бағдарламасына енгізу жоспарланған болатын. Федерацияның бас хатшысы Бақдәулет Сәбитов: «Біріншіден, 5-11-сынып арасында кәсіби тұрғыда дайындау жоспарлануда. Ал 1-сынып аралығында қазақ күресінің акробатикалық жаттығуларын үйрету қарастырылған. Қыздар арасында да, ұлдар арасында да біз балуандарды дайындауға әзірміз. Дегенмен әр оқушының өз таңдауы бар. Сол себепті біз гимнастика федерациясымен келістік. Яғни, қалағандары қазақ күресінен бөлек гимнастиканы үйрене алады», – деді. Міне, осыған байланысты Қазақ күресі елордадағы бес мектептің бағдарламасына енгізіледі. Ал енді бұл балуандарды кім жаттықтырады? «Қазақ күресін барлық мектептің бағдарламасына қосу үшін мамандардың жетіспеушілігі туындауы мүмкін. Сондықтан біз мамандар дайындайтын Қазақ күресі академиясын ашуды жоспарлап отырмыз. Академия мамандарды ғана оқытып қана қоймай, төрешілердің біліктілігін арттыру, ұлттық күрестің ғылыми-практикалық тұрғыда зерттелуін қамтамасыз етеді. Яғни, барлық әлемдік спорт ретінде біз де қазақ күресін ғылыми тұрғыдан зерттеуіміз керек», – деді Дәурен Абаев.
«Өткен жылдың қазан айында Қазақ күресі федерациясының өкілдері федерацияның президенті қызметін маған сеніп тапсырған болатын. Осы уақытқа дейін біз атқарылуы тиіс шаруалар мен шараларды реттеп, жұмысты жүйеледік, жоспар құрдық. Соған сәйкес, бірқатар кешенді жобаны іске асырғалы отырмыз. Біздің негізгі мақсат – қазақ күресін әлемдік деңгейге көтеру», – дейді Қазақ күресі федерациясының президенті.
Әдебиет БЕЛГІБАЙҰЛЫ
«Өткен жылдың қазан айында Қазақ күресі федерациясының өкілдері федерацияның президенті қызметін маған сеніп тапсырған болатын. Осы уақытқа дейін біз атқарылуы тиіс шаруалар мен шараларды реттеп, жұмысты жүйеледік, жоспар құрдық. Соған сәйкес, бірқатар кешенді жобаны іске асырғалы отырмыз. Біздің негізгі мақсат – қазақ күресін әлемдік деңгейге көтеру», – дейді Қазақ күресі федерациясының президенті.
Әдебиет БЕЛГІБАЙҰЛЫ