Қандастарым менің, жерлестерім, бауырларым, қабырғамыз қайысып, іштен күйініп отырмын. Бұл – өзіміздің ел! Төбелесқұмар емес, жуас ел едік. Жігіттердің шамына тиген әлдебір топтың жетегінде кетіп қалғаны белгілі болып жатыр. Сондықтан, азаматтарға, бауырларыма тоқтау айтамын. Елдің, жердің басында отырған халық емеспіз бе?", - деді ол.
А.Әшімовтың айтуынша, үлкен елдердің, дамыған мемлекеттердің қатарына қосыламыз деген ниетіміз бар, талпынып келеміз. Сол жолда атқарылған қыруар шаруаға сыз түсірмегеніміз абзал.
"Бір құмалақ бір қарын майды шірітеді". Жігіттер ақылға салмай, намысқа беріліп кеткен болу керек деп ойлаймын. Мен қазақтың жігіттерін кінәламаймын, шыдамы таусылған тұста шарт кететін қасиет қанымызда бар. Ежелгі бабаларымыз жоңғарлармен соғысты, кешегі аталарымыз фашистермен шайқасты. Әкемізді бердік сол майданға. Бірақ ол – басқа соғыс еді. Ал мынау – ауыл арасындағы төбелес. Алайда, резонансы жаман. Көрші елдерге күлкі боламыз, мазаққа айналамыз. Осыларды ескеру керек. Қаны қызып алған адамдар қайдан ескерсін?! Оны да түсіну керек. Бірақ тоқтату қажет қанқызбалықты", - деді Халық әртісі.
Белгілі тұлғаның пікірінше, Қордайдағы төтенше оқиға салдарынан қан шығып жатыр, өлім орын алып жатыр. Оның кесірі тиетінін білгеніміз дұрыс.
"Мешкей деген жақсы ат емес. Мына жақтан дүнгендер, мына жықтан ұйғырлар шығады, олар да оңай халық емес. Төбелес шығарып жүрген қаны бұзылған біреулер болуы мүмкін. Қазақтарды кінәлаудан аулақпын, дегенмен ақымақтармен ақымақ болудың жөні жоқ. Бұл – ақымақтық төбелес. Мұндайды қоштамаймын", - деген Асанәлі Әшімұлы бұл ахуалды қатты уайымдағанын жеткізді.
Тіпті, таңертең барып, халыққа тоқтау айтсам ба екен деген ой алған.
"Түнімен ұйқым қашты, тынышым бұзылды. Менің туған жерімде болып жатқан оқиға болғандықтан айналамдағы кейбір пиғылы бөлек жандар ала көзімен қарайды. "Ана жақта бауырларың не істеп жатыр?" дегендей. Жастар біз секілді қарияларды аясын. Одан да білімге, ғылымға талпынсын. Төбелестің аты – төбелес, аты да жақсы емес", - деді Еңбек Ері.
