Қазақстанда тұрғын үй бағасы қарқынды өсіп жатыр. LS агенттігінің хабарлауынша, бір ай ішінде қайталама нарықтағы тұрғын үйдің бағасы биыл наурызда 2%-ға, бір шаршы метрі үшін 257,3 мың теңгеге дейін өсті. Жаңа пәтер құны 0,5%-ға, 324,5 мың теңгеге дейін қымбаттады. Пәтер жалдау ақысы 0,6%- ға, бір шаршы метр үшін 1,7 мың теңгеге дейін өсті.
Сонымен қатар, 2020 жылғы желтоқсаннан бастап қайталама нарықтағы жылжымайтын мүлік 10,4%–ға, ал 2020 жылғы наурыздан бастап 22,2%-ға қымбаттады.
Жаңа тұрғын үй бағасы желтоқсанмен салыстырғанда 4,7%-ға және наурыз айымен салыстырғанда 8,4% - ға өсті.
Ал жалдау желтоқсанмен салыстырғанда 5,1% - ға және наурыз айымен салыстырғанда 10,3% - ға қымбаттады.
Еске сала кетейік, Қазақстанда зейнетақы ақшасына тұрғын үй сатып алу мүмкіндігіне байланысты жылжымайтын мүлік құны күрт өсті. LS агенттігінің мәліметінше, Қазақстанда кей өңірлерде жалға берілетін тұрғын үй 41%-ға қымбаттаған.
Ұлттық статистика бюросының дерегінше, биыл қаңтарда Қазақстанда жаңа тұрғын үйдің шаршы метрі 319,2 мың теңге болды. Бұл 2020 жылғы желтоқсанға қарағанда 3%-ға, өткен жылғы қаңтардағыға қарағанда 7,3%-ға көп.
Өскеменде ең көп өсім байқалады - бір айда 32,4%-ға өскен. Ал Оралда қайталама нарықтағы үй бағасы 32% қымбаттады.
Қазақстандағы үш қалада жаңа тұрғын үй арзандады. 2020 жылғы желтоқсанмен салыстырғанда Атырауда 8,5%-ға, Ақтауда 3,8%-ға, Шымкентте 4,8%-ға арзандаған.
Ал Нұр-Сұлтанда үйдің бір шаршы метрінің құны 400 мың теңгеден асты. Әзірге бұл - елдегі ең жоғары баға.
Ерке сала кетейік, бұған дейін Aikyn.kz Қазақстанда тұрғын үй неге қымбаттап жатқанын және тұрғын үйдің бағасына әсер ететін негізгі факторлар туралы жазған еді.
