Абырой болғанда полиция қызметкері дер кезінде жетіп қыздың мойнынан арқанды шешіп үлгерді, – деп хабарлайды Aikyn.kz тілшісі.
Оқиға кеше Жақсы ауданында болды. Дәл сол күні Жақсы аудандық полиция бөлімінің кезекші бөлімшесіне Перекатное селосының 28 жастағы тұрғынынан телефон хабарламасы түсті. Әйел оның 32 жастағы әпкесі кәмелет жасына толмаған қызын аяусыз ұрып жатқанын хабарлаған.Жедел-тергеу тобын күтпестен учаскелік инспектор – Данияр Нұрғамиден дереу оқиға орнына аттанған. Мекенжайға барған кезде полиция капитаны үш баланың анасы ішімдікке салынып полицияның тізіміне алынған үй иесінің мас күйінде балаларын ұрып жатқанының үстінен түскен. Дәл осы тұста үйге жүгіріп кірген 11 жастағы қыз әпкесінің қорада асылып қалғанын хабарлаған.«Куәгерлердің айтуынша, үйінде жанжал шығарған әйел қызының тамағынан қылқындырып, інісі мен сіңлісін балалар үйіне өткізетінін айтып қорқытыпты», – дейді Ақмола облысы Полиция департаментінің баспасөз қызметінің жетекшісі Гүлнәр Пинчук.
Абырой болғанда, жасөспірім қыз есінен танып қалса да, тірі қалды. Тәртіп сақшысы бірден жедел жәрдем бригадасын шақыртып, кезекші бөлімге болған жағдайды хабарлаған. Қазіргі уақытта кәмелет жасына толмаған қыз өзін жақсы сезінеді, аурухананың оқшаулағышында орналасқан. Отбасы профилактикалық тізімде тұрған 14 жастағы қызбен психологтар жұмыс жүргізуде. Полиция капитаны, Жақсы аудандық полиция бөлімінің жергілікті полиция қызметінің учаскелік инспекторы Данияр Нұрғамиден осылайша кәмелет жасына толмаған қызды бір өлімнен арашалап, сауапты іс жасады.«Учаскелік полицей дереу сыртқа жүгіріп шығып, 14 жастағы қыздың қора шатырының арқалығына асылып тұрғанын көреді. Бірден іске кіріскен тәртіп сақшысы уақыт жоғалтпастан қызды жоғары көтеріп, мойнындағы ілмек арқанды шешіп алды», – дейді Гүлнәр Пинчук.
Абзал АЛПЫСБАЙҰЛЫ, Ақмола облысы