Петропавлда Табиғи монополияларды реттеу агенттігі қаланы жылумен қамтып отырған жылу-энергия компаниясын сотқа берді. Себебі тұрғындардан заңсыз қаржы жинап келген.
Монополистер соңғы жылдары тұтынушыларға жылу тасымалына кеткен шығынды өтеуді міндеттепті. Орталықтандырылған жүйеге қосылған жер үйлердің иелеріне таратылған түбіртекте «жылу шығыны» деген бағана пайда болып, оларға заңсыз қосымша ақы қосылған. Тіпті, кейбіріне 50 мың теңгеге дейін есепшот келген. Ақыры мұндай төлем жасауға қарсылық білдіргендер тиісті органдарға шағымданған.
– Біздің мамандар ауданаралық экономикалық сотқа талап-арыз берді. Яғни, жылу компаниясы мұндай есептеуді тоқтатуы керек. Бұл – заңсыздық, біз 2020-2021 жылдардағы төлемдерді қайта есептеуді талап етіп отырмыз. Ал артық ақша тұтынушыларға қайтарылып берілуі керек, – дейді Табиғи монополияларды реттеу комитетінің СҚО бойынша департаменті басшысының орынбасары Айхын Жиенқұлов.
