Қытай астанасы Бейжің қаласында қысқы Олимпиада ойындарында 19 мыңнан астам волонтер жұмыс істейді. Бұл жөнінде Халықаралық Олимпиада комитетінің сессиясында ұйымдастыру комитетінің вице-президенті Ян Шуань мәлім етті. «Қазір қысқы Олимпиада ойындарында 19 мың волонтер қатысуда. Алдағы күндері қытай халқының қонақжайлығынан ләззат алыңыздар», – деді ол. Айтулы сынға әлемнің 90-нан астам елінен спортшылар келеді деп күтілуде. Бұған дейін Оңтүстік Кореяда өткен 2018 жылғы Пхёнчхан Олимпиадасында 95 елден спортшылар келген еді. Айта кетейік, аталған Ақ Олимпиадада еліміздің намысын 34 спортшы қорғайды. Олимпиада ойындары 4-20 ақпан аралығында өтеді.
А.ЖАСАНҰЛЫ