Алматыда Қазақстан тарапының бастамасымен Қазақстан, Қырғызстан және Ресейдің кеден және салық қызметінің үшжақты кездесуі өтті, – деп жазады primeminister.kz.
Кездесуде үш елдің салық және кеден қызметінің мәселесі талқыланды. Келіссөздер делегациясын Қазақстанның Премьер-министрінің орынбасары – сауда және интеграция министрі Бақыт Сұлтанов басқарды.
«Соңғы уақытта ЕАЭО нарығында қытай тауарларының көлеңкелі айналымының ұлғаю үрдісі байқалуда. Мұндай үрдіс біздің елдеріміздің үкіметі тарапынан тиісті назарсыз қала алмайды», – деді Бақыт Сұлтанов.
Ол заңсыз импорттың ұлғаюына алып келетін мәселелер: бюджетке салықтың толық түспеуіне, одақ нарығында контрафактілік, сапасыз, қауіпті тауар айналымы екенін айтты.
«Бұл фактор өзара саудадағы бәсекелестік нарықтың дамуына теріс әсер етеді. Бұл түптеп келгенде экономиканың дамуына қауіп төндіреді», – деді Бақыт Сұлтанов.
Қырғызстаннан келіссөздерге кеден және салық қызметтерінің бірінші басшылары қатысты. Қырғыз делегациясын Министрлер кабинеті төрағасының бірінші орынбасары Арзыбек Кожошев басқарды.
Ресей тарапынан қаржы министрінің орынбасары, статс-хатшы Алексей Сазанов бастаған кеден және салық қызметтерінің басшылығы қатысты.
Сондай-ақ Қазақстан, Қырғызстан және Ресей арасында ақпарат алмасу мәселесі де қаралды. Күн тәртібінде өзара саудада өткізілетін тауарлар бойынша тауарға ілеспе құжаттарда құнды дұрыс көрсету проблемасы да талқыланды.
