Өңірде 904 мемлекеттік орта білім беру мекемесі болса, оның 51-і – саманнан салынған, әбден тозығы жеткен. Бұл туралы бүгін «AMANAT» партиясы Түркістан облыстық мәслихатындағы фракцияның мәжілісінде мәлімделді.
«AMANAT» партиясы Түркістан облыстық филиалының атқарушы хатшысы, фракция жетекшісі Бейсен Тәжібаевтың төрағалығымен өткен жиынның күн тәртібінде 3 өзекті мәселе қаралды. Олар: облыстағы апатты мектептердің жағдайы; облыстың қазба байлықтары және жер қойнауын пайдалану; 2022 жылғы бюджетке толықтырулар мен өзгерістер енгізу жайы.
Түркістан облыстық Адами әлеуетті дамыту басқармасы басшысының міндетін атқарушы Амантай Өсербаевтың айтуынша, биыл 4 апатты жағдайда тұрған және 2 үш ауысыммен оқытатын мектептерге құрылыс жүргізіліп жатыр. Жыл соңына дейін олардың 4-еуінің құрылысы аяқталып, пайдалануға берілуі тиіс.
– Облыстық мәслихат депутаттарының ұсынысы негізінде басқарма тарапынан жұмысшы топ құрылып, аудан және қалаларда мониторинг жүргізілді. Нәтижесінде, биыл 52 мектепте үш ауысымда білім беріп жатқаны және ғимараты сабаннан салынған апатты жағдайдағы 51 мектеп жұмыс істеп тұрғаны анықталды, – деді А.Өсербаев.
Фракция жетекшісі Бейсен Тәжібаевтың айтуынша, былтырдан бастап жер қойнауын пайдалану мәселесіне зерделеу жұмыстары қарқынды жүргізіліп, нәтижесінде заңбұзушылық азайды. Кентау қаласы мен Шардара, Отырар, Созақ, Сауран аудандары заңбұзушылық бойынша алда тұр. Мониторинг нәтижесі туралы облыстық Инвестиция және экспорт басқармасының басшысы Қайрат Әзімов баяндады.
– Рейдтік шаралардың нәтижесінде облыс аумағында 18 келісімшарт пен 4 лицензияның күші мерзімінен бұрын тоқтатылды. 2021 жылы 55 құқықбұзушылық анықталып, 43 факті бойынша келтірілген залалдарды өндіру үшін Экология департаментіне жолданған. Биыл да облыстық жұмысшы топ заңсыз жер қойнауын пайдаланушы тұлғаларға рейдтер жүргізуді жоспарлап отыр, – дейді басқарма басшысы.
Жиын барысында жергілікті Полиция басқармасының басшысы Асылхан Төреханов осы мәселені жалғап, заңсыз жер қойнауын пайдаланып жатқан тұлғаларға қарсы қолға алынған тәртіптік іс-шаралар туралы баяндады. Депутаттар апатты мектеп санын азайту, жер қойнауын заңсыз пайдаланушыларға тосқауыл қою жұмыстары күшейетінін айтып, жауапты басшыларға ұсынысын жеткізді. Қоғамдық бақылауда тұрғанын ескертті. Сондай-ақ 2022 жылғы бюджетке толықтырулар мен өзгерістер енгізу туралы облыстық Стратегия және экономикалық даму басқармасының басшысы Қанат Қайыпбек хабарлама жасады.
Мәжілісті түйіндеген Б.Тәжібаев күн тәртібінде қаралған мәселелер облыстық мәслихаттың кезекті сессия отырысына ұсынылатынын, әрбір мәселе фракция қадағалауында болатынын жеткізді.
