«AMANAT» партиясының Орал қалалық қоғамдық қабылдауына келіп, түрлі әлеуметтік мәселені көтеретін, жеке өздеріне көмек сұрайтын азаматтар аз емес. Олардың шағымы ешқашан назардан тыс қалмайды.
«Көшеміздің іргесінде орман тиіп тұр, мұнда небір бұзақылар жүреді. Сондықтан тентек біреу-міреу ұрынып жүре ме деп баламыз мектепке барып-келгенше уайымдаумен боламыз. Амалымыз таусылғасын, «AMANAT»-тың қоғамдық қабылдауына барып, жәрдем сұрадық. Арада бір ай өткенде бірден үш көшеге жарық жүргізіп берді. Сол күні қатты қуанғаннан үйімізге кіргіміз келмей ұзақ уақыт сыртта жүрдік. Өтінішімізді орындаған «AMANAT»-қа мың алғыс!»,– дейді жергілікті тұрғын Динара Қабиева.
Халықпен тұрақты кездесіп, мұң-мұқтажын тыңдаған депутаттардың айтуынша, бұқараны толғандыратын мәселелердің дені – әлеуметтік жағдай. Тұрғындар ауланы абаттандырып, жарық жүргізіп, көшені асфальттап, балаларға ойын алаңдарын салып беруді сұрайды. Халқы жылдан-жылға көбейіп келе жатқан Орал үшін бұл заңды да.
– Көпбалалы ата-аналар келеді. Олар материалдық көмек сұрайды. Сосын үйдің мәселесімен көп келеді, тағысын тағы... Өмір болған соң шешілмей жатқан мәселе көп. «AMANAT» партиясының депутаттары халыққа қалай болғанда да, қай жағынан болса да көмектесуге қашанда дайын. Бұл көшеге жарық жүргізу бюджетте мүлдем қарастырылмаса да, «депутаттық сағат» арқылы осы мәселені көтерген партиялықтар бірден үш көшеге жарық жүргізуге ықпал етті»,– дейді «AMANAT» партиясының мүшесі Нұргүл Ашықова.
Айта кетелік, былтырдың өзінде «AMANAT» партиясының қоғамдық қабылдауына 4,5 мыңға тарта тұрғын көмек сұрап келген. Олардың жартысына жуығы оң шешімін тауыпты. Көшесіне жарық жүргізіліп, көңілін демдеген тұрғындар енді бейнебақылау камерасын қоюды сұрап отыр.
