«AMANAT» партиясының елдің мұң-мұқтажын тікелей өз ауыздарынан тыңдау үшін шалғайдағы ауылдарды аралап жүргеніне, міне 1,5 айдан асты. Саяси ұйымның Павлодар облысындағы қоғамдық қабылдау бөлмесінің осындай бір сапарында Төртқұдық ауылына жолы түскен еді. Елді мекен Екібастұздың әкімшілік бөлінісіне кіргенімен, қаладан 90 шақырым.
Ауылда жалғыз кен байыту фабрикасы бар, бірақ одан тұрғындардың бәріне жұмыс табыла бермейді. Басқа өндіріс жоқ. Сондықтан адамдар жанбағарлық жұмыс іздеп, жыл сайын жан-жаққа көшіп кетуде. Әсіресе, жастар жағы толассыз ағылуда. Қазір мұнда негізінен жасы ұлғайған адамдар мен мүмкіндігі шектеулі жандар қалған. Ауру-сырқаулы кісілер бар. Ауылдықтар барлық керек-жарақтарын, ас-суы мен дәрі-дәрмегін Екібастұздан алдырады. Бірақ оған жиілетіп көлік жалдап бара беру оңай емес, әсіресе қыстың боранды күндері қиын. Қоғамдық қабылдау бөлмесінің мамандарына төртқұдықтықтар осы және басқа да арыз-шағымдарын жеткізген болатын.
– Мен аурушаң жанмын, жүрегім қағады, бойымда қант құрамы шамадан тыс дейді. Жүріп-тұруым қиын. Күнделікті үзбей ішетін дәрі-дәрмегім бар, оны 4 мың теңгеге көлік жалдап Екібастұздан алдырамын. Ауылда дәріхана жоқ, дәрі жоқ. Жалғыз медбикеміз бар, оның өзі аурушаң, оның бар жұмысы өзіміз әкеліп берген екпені салумен шектеледі. Болды! – дейді ауыл тұрғыны Сара Ибраева.
Сондай-ақ басы ауырып, балтыры сыздаған науқастың бәріне дәрігерге емделу үшін, әйтпесе дәрі-дәрмегін алдыру үшін Екібастұзға баруға тура келеді. Ал ауылда жедел жәрдем жоқ. Тұрмыстық проблема қинаған ауылдықтар әкім қаламен екі ортаға қатынайтын көлік мәселесін шешіп берсе екен дейді.
