Қазақстан Парламенті Сенатының Төрағасы Мәулен Әшімбаев Түркі мәдениеті халықаралық ұйымының Бас хатшысы Сұлтан Раевпен кездесті.
Мәулен Әшімбаев келесі жылы ТҮРКСОЙ-дың құрылғанына 30 жыл толатынын, осы жылдар ішінде ұйымның ұйытқы болуымен түркі әлемінің ынтымақтастығын арттыруға арналған маңызды іс-шаралар мен жобалар іске асырылғанын айтты.
«Түркі мемлекеттерінің мәдени-гуманитарлық байланысын арттыру тұрғысынан ТҮРКСОЙ-дың маңызы зор. Соңғы жылдарда түркі әлемі елдерінің ынтымақтастығы жаңа деңгейге көтерілді. Бұл ретте біздің мемлекет басшыларымыз қабылдаған шешімдердің ықпалы мол екенін атап өткен жөн», – деді Мәулен Әшімбаев.
Сонымен қатар Сенат Төрағасы алдағы қыркүйек айында өтетін Әлемдік және дәстүрлі діндер лидерлерінің VII съезі туралы сөз қозғады. Оның айтуынша, бұл форум түрлі дін өкілдері арасында тиімді өзара байланыс орнатуға және ынтымақтастықты нығайтуға ықпал етеді.
Мәулен Әшімбаев съезд хатшылығының басшысы ретінде Сұлтан Раевты аталған діни форумға қатысуға шақырды.
Өз кезегінде ТҮРКСОЙ-дың Бас хатшысы түркі әлеміне ортақ көрнекті тұлғалар мен жазушылардың мерейтойларына қатысты жоспарланған іс-шаралар туралы айтты. Сондай-ақ ол Түркістан қаласының түркі әлемі астанасы ретіндегі рөлін күшейтудің маңызына тоқталды.
Кездесу соңында Мәулен Әшімбаев Қазақстан Парламентінің Сенаты ұйым аясында түркі мемлекеттері арасындағы мәдени ынтымақтастықты одан әрін нығайту үшін белсенді жұмыс істеуге дайын екенін жеткізді.
