Спорт жанкүйерлері назар аударып, қадағалап отырған доданың бірі – теннистен Австралия ашық чемпионаты. «Australian Open» деп атаудың да еш сөкеттігі жоқ.
Әйгілі испан теннисшісі Рафаэль Надальдің ширек финалда жеңіліс табуын мамандар «турнирдің басты сенсациясы» деп бағалауда. 26 жастағы австриялық Доминик Тим 33 жастағы Надальдің алға шығуына еш мүмкіндік берген жоқ. 4 сағат 10 минутқа созылған матч әлемнің бесінші ракеткасының жеңісімен аяқталған.
«Бірінші сетте есеп 5:3 болып тұрған кезде алға шығып кететін мүмкіндігім болды. Егер солай болған болса, әрі қарай жағдай басқаша өрбитін еді. Доминик жақсы шабуылдап, мені қолайсыз жағдайға қалдыра берді. Тай-брейкте мүлде нашар ойнадым. Тимнің ойынына ризамын. Онда бәрі бар – энергия да, еркіндік те, мықтылық та. Оған басқа турнирлерде де табыс тілеймін» депті Надаль матчтан кейін. Бұл Надаль мен Тимнің алғашқы айқасы емес. Осыған дейін 13 рет ұшырасқан. Соның тоғызында испан спортшысы басым түссе, Тим 4 мәрте ғана жеңіске жеткен екен. Енді Доминик финалға шығу үшін бүгін (31 қаңтар) германиялық Александр Зверевпен кездеседі. Неміс теннис шебері осының алдында атақты швейцариялық Станислав Вавринканы жеңіп кеткен. Сөйтіп, Зверев пен Доминиктің қай жеңгені финалда Новак Джоковичпен кортқа шығып, чемпиондыққа таласпақ. Australian Open-ді алты рет жеңіп алған Роджер Федерер осы жолы да титулдан үмітті болған. 38 жастағы спортшы жарақатына қарамастан сайыстың жартылай финалына дейін жетті. Ширек финалда ол 28 жастағы америкалық Теннис Сандргенді қапы қалдырған. Жарақатына байланысты өте ауыр қимылдап, бірнеше рет ойсырай жеңілуге шақ қалған Федерер ақыры жартылай финалға берілер жолдаманы иеленіп тынды. Жеті матчболды қатарынан жеңіп, бесінші сетте сайыс тағдырын қолына алған болатын. «Ғажайыпқа сену керек» дейді спортшының өзі. Аңызға айналған теннисші Australian Open турнирінің финалына 15-рет шыққан. Ал жартылай финалдағы бәсеке – оның Джоковичпен 50-рет кездесуі еді. Осы кездесуден кейінгі екеуінің жеке статистикасы бойынша – 27 рет Новак, 23 рет Роджер жеңісті олжалаған. «Үлкен дулыға» сайыстарында Федерер Новакты 2012 жылдан бері жеңе алмай келе жатыр. Бұл жолы да жеңіске бастар жолды таба алған жоқ. Осы турнирдің жеті дүркін чемпионы Джокович алты дүркін чемпион Федерерден 7:6, 6:4, 6:3 есебімен басым түсті.
Жалпы, биылғы турнирдің басты сенсациясы – Надаль ғана десек қателесерміз. Сайыс бастала салысымен жапон Наоми Осака, америкалық Серена Уильямс, даниялық Каролин Возняцки, неміс Анжелика Керберлер де сәтсіздікке тап болды. «Ролан Гаррос», «Wimbledon, US Open» сияқты айтулы додалардан трофейді аямай жиған Серена қытай қызы Ван Цяннан ұтылып қалды. Ал жапон қызы Наоми Осака 15 жастағы америкалық Кори Гауффтан жеңілді. «Көрермендерге ерекше алғыс айтамын. Екі жыл бұрын жасөспірімдер арасындағы Australian Open турнирінің алғашқы айналымында-ақ жарыс жолынан шығып қалған едім. Ал қазір Наоми Осаканың өзін жеңіп кеттім. Бүкіл жарыс бойы сабыр сақта, күрес, әр ұпайға ойна, жеңесің деп айтумен болдым» депті Гауфф матч біте салысымен.
Осы жарысқа қатысқан қазақстандық теннисшілердің ешбірі жүлдеге қол жеткізе алмады. Жұптасып өнер көрсеткен Михаил Кукушкин мен Александр Бублик жартылай финалда Раджив Рам мен Джо Солсбери жұбынан ұтылып қалды (6:4, 3:6, 4;6). Алайда дәл осы кезеңге дейін Кукушкин мен Бублик жұбы төрт кезеңде жеңіске жеткен болатын. Сөйтіп, олар әлемдік рейтингтегі ұпайларын жаңартып қана қоймай, әрбірі 100 мың АҚШ доллары көлемінде сыйақы да еншіледі.
Зарина Диас та ұзаққа шаба алмады. Ол үшінші айналымда Нидерланды елінің өкілі Кики Бертенске есе жіберді. WTA рейтингінде Диас 73-орында келе жатса, Бертенс үздік ондықты түйіндеп тұр. Юлия Путинцева да үшінші айналымнан әрі аса алмады. Әлемнің 38-ракеткасы әлемнің 3-ракеткасы румыниялық Симон Халептен айласын асыра алған жоқ. Алайда қазақстандық теннисшілерді жеңген қыздардың екеуі де финалға дейін жете алмады. Симон Халеп жартылай финалда испан спортшысы Гарбинье Мугурусадан жеңілді. Екінші жартылай финалда әлемнің бірінші ракеткасы австралиялық Эшли Барти америкалық София Кениннен мықты болмай шықты. Турнирге қатысқан тағы бір отандасымыз Елена Рыбакина дәл осы Бартиден жеңіліп, жарысты аяқтаған еді. Сөйтіп, әйелдер арасындағы жекелей өнер көрсету сайысының финалында София Кенин мен Гарбинье Мугуруса бақ сынайтын болды. Мугуруса өз карьерасында «Үлкен дулыға» турнирлерінің финалына төртінші рет шығып отыр. Соңғы рет 2017 жылы «Уимблдон» бәсекесінің финалына шығып, жеңімпаз атанған. Ал бұл жарысқа ол әлемдік рейтингтің үздік отыздығына енбеген күйінде келді.
Ерлер арасындағы жұптасып өнер көрсету сайысының финалында Раджив Рам\Джо Солсбери мен австралиялық Люк Сэфилл \Макс Перселл жұбы кездеседі. Әйелдер арасындағы финалда Барбора Стрыцова (Чехия) \ Се Шувэй (қытайлық Тайпей) мен Тимея Бабош (Венгрия) \ Кристина Младенович (Франция) жұбы шеберлік байқасады.
Австралия ашық чемпионатының жалпы жүлде қоры – 71 миллион доллар.
Абай АЙМАҒАМБЕТ
