Ақмола облысы соңғы жылдары азық-түлік тауарлары өнімімен өз қажеттілігін толығымен қамтамасыз ететіндей деңгейге жеткен. Сондай-ақ ішінара елдің бірқатар аймағының да тұтынушыларын қанағаттандыруға қауқарлы.
Облыс әкімдігінің Кәсіпкерлік және өнеркәсіп басқармасының мәліметінше, бүгінде өңір ұн, жұмыртқа, қара мал және құс еті, сүт және картоп өнімдерімен облыс тұрғындарының қажеттілігін толықтай қамтамасыз етіп келеді. Аталған өнім түрлері өндірісінің жылдық көлемі бірнеше есеге ұлғайған.
Соңғы деректерге сәйкес, облыста бір жылда 200,1 мың тонна ұн, 793,2 миллион дана жұмыртқа, 104,6 мың тонна сүт, 23,3 мың тонна қара мал еті, 68 мың тоннадан астам құс еті мен 268 мың тонна картоп өндірілетін болған. Өңір кәсіпкерлері ішкі нарықпен қоса өз өнімдерін Ресей, Беларусь, Словакия, Түркия, Германия және Чехия сияқты алыс-жақын шетелдерге де шығаруға мүмкіндік алған.
«Қазір облыстың ауыл шаруашылығы тауар өндірушілерінің өнім өндіру қарқыны көңіл қуантарлық. Өткен жылғы қорытындылар бойынша Ақмола облысы кәсіпкерлері 36,5 мың АҚШ долларына тең 96 тонна ұнды Ресейге, 31,7 мың АҚШ долларына тең 38,7 тонна сүт пен 155 тонна қара мал етін Ресей мен Беларусь елдеріне, 140 тонна картоп өнімдерін Германия, Нидерланд және Ресей мемлекетіне, 2 619 тонна құс етін Ресей мен АҚШ-қа, 1 911 тонна жұмыртқаны Ресей, Түркия, Чехия және Словакия елдеріне импорттағаны анықталды», – дейді облыс әкімдігінің Кәсіпкерлік және өнеркәсіп басқарма басшысы Ербол Оспанов.
Жалпы, өткен жыл қорытындылары бойынша ұн өндірісі 1,6 есе, сарымай 3,3 пайызға, құс еті 7,8 пайызға ұлғайған.
