Президент Жолдауынан әрбір қазақстандық қоғамды толғандырған көптеген сұрақтарға өз жауабын алды деген ойдамын. Мен Мәжіліс депутаты ретінде әлеуметтік мәселелермен, әсіресе отбасы және балалардың құқықтарын қорғаумен айналысып келемін. Осы орайда бірқатар маңызды бастамалардың бастау алғанын атап өткім келеді.
Біріншіден, «Ұлттық қор – балаларға» дегеннің өзі құлаққа жағымды, көкейге қонымды. Ендігі жерде болашақ ұрпақ та Ұлттық қордан үмітті болады. Мемлекет 18 жасқа дейінгі барлық балалар үшін жинақтаушы шоттар ашады. Онда Ұлттық қордың жыл сайынғы инвестициялық табысының 50 пайызы аударылатын болады. Осылайша, балалар капиталының негізі қаланады. Бұл балаларды қолдау жүйесін түбегейлі өзгертпек. Кәмелетке толғаннан кейін жинақталған сома тұрғын үй сатып алуға және білім алуына бағытталады.
Естеріңізде болса, жылдың басында біз әрбір балаға, әсіресе аз қамтылған отбасыларда тұратын балаларға тағайындалуы керек атаулы көмек мәселесін көтердік. Бүгінде аз қамтылған 625 мың бала бар. Сондықтан осы мәселенің шешімі Президент Жолдауында көрініс тапқанына қуаныштымын.
Екіншіден, бала күтімі жөніндегі жәрдемақыны төлеу мерзімі 1 жылдан 1,5 жылға дейін ұзаратын болады. Бұл норма жұмыс істейтін және жұмыс істемейтін ата-аналарға да қатысты. Ендігі жерде бұл құқықты жарты миллионға жуық ата-ана пайдаланады деген сөз. Өздеріңіз білесіздер, соңғы жылдары бұл мәселені қоғам өкілдері де, депутаттар да жиі көтеріп келді. Аталған шара тек аналарға ғана емес, ең алдымен отбасыларға қолдау көрсетеді. Себебі бала дүниеге келген соң отбасының шығыны да арта түседі. Аналар әлеуметтік жағдайына байланысты баланы үлкен балаларына қалдырып, жұмысқа ерте шығып кетіп жатыр. Сондықтан әрине осы кезеңде баланың анасы мен отбасына кез келген қолдау өте маңызды.
Динара ЗӘКИЕВА,
Мәжіліс депутаты
