«Әулиекөл ауылындағы «Болашақ» стадионында орналасқан штабта болдық. Онда бос орын жоқ деп айтуға болады. Көп мөлшерде азық-түлік пен әртүрлі заттар жеткізілді. Бұл – шынайы патриотизмнің жарқын үлгісі. Адамдар қай өңірде тұрып жатқанына қарамастан, отандастарына көмектесу үшін жұдырықтай жұмылды», – деді ол.Сонымен қатар ол зардап шеккен елді мекеннің 34 оқушысы жыл сайынғы «Баланы мектепке даярлайық!» акциясы аясында мектеп формасы жиынтығымен, оқу құралдары және кеңсе тауарларымен қамтамасыз етілетінін жеткізді.
«AMANAT» партиясының Қостанай облыстық филиалының атқарушы хатшысы Бибігүл Аққожинаның айтуынша, қазіргі уақытта өңірде 21 гуманитарлық пункт жұмыс істеп жатыр. Бұл бекеттер сырттан келген көмекті қабылдап, оны жергілікті халыққа таратумен айналысуда. Хатшы зардап шеккендерге тағы не қажет екенін айтты.
«Қазақстандықтардың қолдауын алғашқы күннен-ақ сезіне бастадық. Жеткілікті мөлшерде көмек жиналды. Өрт сөндірушілер азық-түлікпен қамтамасыз етілді. Зардап шеккендерге мүмкіндігінше тұрмыстық техника мен құрылыс материалдарын жіберуді сұраймыз», – деді ол.Мәжіліс депутаты, «AMANAT» партиясы фракциясының мүшесі Аманжол Әлтай өрт сөндіруге жұмылдырылған құтқарушылар мен әскери қызметшілер-дің рөлін атап өтті.
«ТЖМ-ның барлық жеке құрамына алғыс айтамыз. Бүгін қалалық ауруханаға барып, жергілікті тұрғын Темір Хамитұлының көңілін сұрап қайттық. Ол басын бәйгеге байлап, алапат оттың арасынан ауылдастарын алып шықты. Сөйтіп, жүріп түрлі жарақат алды. Зардап шеккен жандардың тезірек сауығып кетуін тілейміз», – деді ол.Мәжіліс депутаты, «AMANAT» партиясы фракциясының мүшесі Динара Зәкиеваның айтуынша, эвакуацияланған адамдардың басым көпшілігі уақытша орналастыру пункттерінен кетіп жатыр.
«Қазір онда 78 адам бар. Бұл – 25 отбасы. Ендігі мақсат – олардың қалыпты өмірге оралуына көмектесу. Бұл үшін партия барлық шараны қабылдауда», – деді ол.«Жастар Рухы» ЖҚ-ның 300-ден астам волонтер төтенше жағдай орнында жұмыс істеп жатыр. Сондай-ақ 1200-ден астам ерікті гуманитарлық көмек жинау пункттеріне жұмылдырылды.
«Мемлекет басшысы Қостанайға барып, орман өртінен зардап шеккен аумақтарды тікұшақпен аралады. Әулиекөл ауылындағы мектепте орналасқан эвакуациялау пунктінде зардап шеккен азаматтармен кездесті. Ел басына күн туғанда «AMANAT» елдің партиясы ретінде алғашқы сәттен бастап жұмыла кірісіп, гуманитарлық көмек ұйымдастырумен айналысты. Бүгінде 807 тоннада астам гуманитарлық көмек жиылды, оның екі жүзге жуығы Қостанай облысына жөнелтілді», – деп атап өтті партия хатшысы Дәулет Кәрібек.Әулиекөлге Нұр-Сұлтан, Алматы қалаларынан және Ақмола, Атырау, Ақтөбе, Атырау, Солтүстік Қазақстан облыстарынан жүк көліктері әлі де жөнелтіліп жатыр. Сонымен қатар Қостанай облысында өрттен зардап шеккендерге көмек көрсету үшін Бірыңғай қоғамдық қор құрылды. Бұл қорға «AMANAT» партиясы орталық аппаратының ұжымы бір күндік жалақысын аударады.
Айта кетейік, 4 қыркүйек күні сағат 9.00-де «AMANAT» партиясының өңірлердегі филиалдарында гуманитарлық көмек қабылдау пункттері ашылып, партия мүшелері мен «Жастар Рухы» қатарынан волонтерлер жасақталған болатын. Бұл туралы сол күні партия Төрағасы Ерлан Қошанов Facebook-тегі парақшасында жазды: «Қостанай облысында болып жатқан табиғи апат баршамызды алаңдатып отыр. Жағдай Мемлекет басшысының жеке бақылауында. Партия мүшелері мен «Жастар Рухы» қатарынан волонтерлер жасақталды, апаттан зардап шеккен тұрғындарға барынша көмек көрсететін болады. Бұдан бөлек, «AMANAT» партиясының өңірлердегі филиалдарында гуманитарлық көмек қабылдау пункттері ашылды. Жағдайдың тезірек тұрақталуын тілейміз. Біз қостанайлықтармен біргеміз және бұл сынақтан бірге өтеміз!».
Партияның барлық аймақтағы филиалдары Қостанай өңіріне көмек көрсетуде белсенділік танытуда. Түркістан облысынан келген волонтерлер алғашқылардың бірі болып қалпына келтіру жұмыстарына қатысуға дайын екенін жеткізді. Белсенді Олжас Мамырдың айтуынша, Түркістан облысының жастары мұндай қиын жағдайдың халыққа қаншалықты ауыр екенін жақсы біледі. «Біз Арыс пен Мақтааралдағы оқиғалардан кейін тұрғындарға көмектестік. Ол кезде еліміздің түкпір-түкпірінен еріктілер біздің облысқа келіп, қалпына келтіру жұмысына тікелей қатысты, қажетті заттар жіберді. «Жастар Рухымен» хабарласып, бірге екенімді жеткіздім және мені еріктілер қатарына қосуды сұрадым. Міне, таң ата салысымен еріктілермен алғашқы гуманитарлық көмекті жинауға кірістік. Алдағы уақытта Қостанай облысындағы өрт шалған орынға Оңтүстіктің аманатын жеткіземіз. Біз ел азаматтарымен біргеміз және ойланбастан Қостанай облысына жол тартамыз», – деп атап өтті Олжас Мамыр. «AMANAT» белсендісі, Түркістан қалалық мәслихат депутаты Нұрсұлтан Жүсіпбаев Қостанай облысында зардап шеккендерге көмек ретінде қабылдау пунктіне 1 тонна ұн жеткізді. Ол бұған дейін де облыста орын алған төтенше жағдайлар мен түрлі қайырымдылық шараларда демеушілік көрсетіп келген. «Төтенше жағдайды бастан өткерген өңірдің тұрғыны ретінде кешегі апаттың қаншалықты ауыр екенін түсінемін. Қазақта «Жұмыла көтерген жүк жеңіл» деген мақал бар. Ел болып бұл сынақтан да өтеміз деп сенемін. Мұндай көмекті жағдай тұрақталғанша жалғастыруымыз керек», – деді Н.Жүсіпбаев. Партияның Павлодар облыстық филиалының мүшелері де белсенді жұмыс істеуде. «Қостанай облысындағы төтенше жағдай ешқайсымызды бей-жай қалдырмады. Тұрғындар белсенді түрде көмек көрсетуде. Олар қолынан келгенше жылы киім, тұрмыстық техника, бірінші кезекте қажетті заттар, тамақ және су әкеліп жатыр. Еліміз бойынша осындай игі іс жасап, көмек көрсетуге барша жұрт атсалысуда», – деді партияның Павлодар облыстық филиалының «Жастар Рухы» жастар қанатының төрайымы Санира Жүсіпова.Қазіргі уақытта волонтерлер партия филиалдары жанынан ашылған гуманитарлық көмек жинау пункттерінде жұмысын жалғастыруда. «AMANAT» партиясы облыстық филиалымен Қызылорда қаласы, 7 аудан және Төретам кентінде, барлығы 9 гуманитарлық көмек қабылдау пункттері азаматтардан келген көмекті қабылдауда. Алғаш болып өз көмегін жеткізгендердің бірі – партия белсендісі, BIALI ЖШС төрағасы Асхат Шәукенбаев. Қиын сәтте өзінің қостанайлықтармен бірге екенін жеткізіп, жерлестерін жұмыла көмек көрсетуге шақырды. Партияның Шымкент қалалық филиалы жанындағы гуманитарлық көмек жинау пунктіне де азық-түлік пен қажетті заттар жеткізілуде. Қостанайлық азаматтарға көмек көрсету үшін Абай ауданына қарасты «Жібек жолы» көтерме базары мен «Сандыбаев» мал базары ұжымдары атынан жалпы 2 тоннаға жуық азық-түлік және гигиеналық заттар әкелінді. Картоп – 500 келі, сәбіз – 200 келі, пияз – 500 келі, қырыққабат – 100 келі, асқабақ – 20 келі, макарон өнімдері – 100 келі, күріш – 50 келі, шәй, сұйық май, сусындар және гигиеналық заттар да бар. Базар әкімшілігі қызметкерінің айтуынша, Қостанай облысында өрттен жапа шеккендерге көмек қоры жиналып жатқанын естіген бойда базар басшылығы мен кәсіпкерлер акцияға атсалысуға асыққан. «AMANAT» партиясы Өскемен қалалық филиалының атқарушы хатшысы Арайлым Есімбекованың айтуынша, партияның облыстық және аудандар мен қалалардағы барлық филиалында Қостанайдағы өрттен зардап шеккен тұрғындарға көмек көрсету бойынша жедел орталықтар ашылған. Сондай-ақ партияның әлеуметтік желідегі парақшаларында арнайы штабтың мекенжайлары мен нөмірлері көрсетілген ақпарат жарияланды. Соның нәтижесінде бір тәулікте жер-гілікті кәсіпкерлер, демеушілер мен тұрғындардан су, бұзылмайтын азық-түлік өнімдері, сұйық май, тұрмысқа қажетті және гигиеналық заттар мен жаңа киімдер жиналған. Қазіргі уақытта еліміздің түкпір-түкпірінен азық-түлік, жеке тазалық заттары, киім-кешек, төсек-орын, сондай-ақ қажетті дәрі-дәрмек пен медициналық бұйымдар тиелген жүк көліктері жөнелтіліп жатыр.
Асыл ТҰМАР