«Бұрын кепілге жылжымайтын мүлік қойып, кооператив құру үшін белгілі бір адамдар санын жинау қажет болса, бұл жобада небәрі 5 АЕК көлемінде жарна төлеп, 3 адаммен бірігуге де болады. Бұл кәсіпкерлер үшін үлкен көмек. Тұрғындармен кездесуде берілетін кеңестің бірі – ауыл әкімдерімен тығыз байланыста болып, ұсыныс-пікірмен бөлісу. Содан кейін жобаға өзгертулер енгізу барысында ең алдымен адамдардың сұранысы мен тілектері сараланады. Яғни, жоба ауыл тұрғындарының әл-ауқатын жақсартуға септігін тигізеді», – деді маман Ұланбек Нұрманов.«Ауыл аманаты» жобасы Жамбыл облысында пилоттық режимде алғаш қолға алынып, оң нәтиже берді. Бұл жетістік ауыл тұрғындарын бағдарламаға қатысуға ынталандыруы тиіс. Мәселен, республикалық бюджеттен осы өңірге 7,2 млрд теңге бөлінді. Жобаға қатысуға 11 ауылдық округ іріктелді. Осылайша, атаулы әлеуметтік көмек алушылардың саны 3 есеге қысқарып, аталған ауылдарда орташа айлық табыс мөлшері 1,7 есеге ұлғайды. Жұмыссыздар саны 36 пайызға азайды. Микро-кредит бойынша мерзімі өткен, 60 күннен асқан төлемдер болмады.
«Жоба ауыл тұрғындары үшін өте тиімді. Өйткені бірде-бір екінші деңгейлі банк 2,5 пайызбен несие бермейді. Әлеуметтік кәсіпорын корпорациясы арқылы берілетін несие өте қолайлы. Мұндағы басты талап – қаржының мақсатты жұмсалуы. Жоба арқылы барлық 19 өнім түрін шығаруға мүмкіндік аламыз», – дейді Жуалы аудан әкімінің орынбасары Рахымқазы Кунязов.«Ауыл аманаты» жобасының ақпараттық түсіндіру тобы 28 шілдеде еліміздің барлық өңіріне 40 күндік ақпараттық марафонға аттанған болатын.
Асыл ТҰМАР