«Астананы жастар қаласына айналдыру үшін мұнда оларды қызықтыратын тартымды орындар көп болуы керек қой. TikTok трендтегі құбылыс болып тұр. Алматыда студия тұрмақ, тұтас TikTok хаустар бар. Оларда адамдар кәдімгідей қонып, өмір сүреді. Сонда контент жасайды, шығармашылықтарын дамытады, идеясы мықты өзге замандастарымен танысады, кейбіреулері бұдан ақшалай пайда да табады. Тамаша емес пе? Хаус болмаса да, тым болмағанда студия ашқым келді. Сөйтіп былтыр қыста Esil университетімен хабарласып, идеямды айттым. Келіссөздерден соң, олар маған 254 шаршы метр алаңды TikTok студияға айналдыруыма рұқсат берді», – дейді ол.Студия әртүрлі тақырыптық модульдерге (контент түсірілетін бөлмелер осылай аталады екен) бөлінген: Shine зонасының қабырғасы көк және сары түсті жылтыр пердемен безендірілсе, Anime модулі жапон мультипликациясы стилінде жасалған. Бұл бөлмелерде тиктокерлер көбіне билерді түсіреді. Ал қызғылт қабырғалы Candy bar зонасы аспаздық тақырыптағы контент әзірлеуге арналса, Beauty Salon модулі мейкап пен шаш әрлеу туралы видеоларды түсіруге қолайлы. Nature зонасының аспан түстес қабырғасына декоративті күн, бұлт, тау және құстар жапсырылған. Мұнда эко-трендтер жайлы контент түсірілетін болар деп топшыладым. Бұл модульдерден басқа, студияда Angel, Barbie зоналары да бар. Кішкентай фэшн-блогерлерге таптырмас мекен екен деп түйдім.
Елордалық студент Алмас Жұмабаев оқу жылы басталғалы бері TikTok студияға жиі келеді.
«Мен Esil университетінде Ақпараттық жүйелер мамандығының 2-курсында оқимын. Былтыр бұл жер жай ғана чил-зона (chill zone – демалуға, тынығуға арналған жайлы орын) болатын, биыл оқуға келсек, TikTok контент түсіруге арналған бөлмелерге айналыпты. Өзім TikTok-ты 2020 жылдан бері қолданамын. Былтырдан бастап әртүрлі трендтегі билерді, стрит билерді билеп, өз каналыма жүктей бастадым», – дейді бозбала.Әзірге Алмастың жазылушысы көп емес, бірақ ол әйгілі тиктокер атану үшін емес, арнаны хобби ретінде ашқанын айтады. Оның пікірінше, TikTok адамдарға көштен қалмай, өзіңді әлемдік ағынның бір бөлшегі ретінде сезінуге тамаша мүмкіндік береді.
«Ондағы алгоритм өте ыңғайлы. Саған тек өзіңе ұнайтын тақырыптағы контент шығады. Оны көріп шығу үшін көп уақыт та қажет емес. Көбіне 15 секундқа дейінгі видеолар жақсы қаралатыны да сондықтан. Бірде менің биім де ойда-жоқта TikTok-та таралып кеткен еді. Жалпы, видео танымал болу үшін, біріншіден, оның сапасы күшті болуы керек, екіншіден, аудионың ырғағы мен қимылы бір-біріне сай болуы қажет», – дейді Алмас.
Бұл студияға миллион жазылушысы бар астаналық тиктокерлер де жиі бас сұғады. Мәселен, солардың бірі әпкелі-інілі Жанкерім мен Байжігіт осында біраз контент түсіріп жүр.
«Бұл студия ашылғанға дейін қалада TikTok түсіретін зоналарды табуда қиналатын едік. Тақырыптық зоналардың көбі балаларға арналмаған, шулы, я болмаса өте қымбат. Видео түсіруге артқы фонның әдемі болуы жеткіліксіз. Бала өзін барынша еркін сезінуі үшін айналасындағы атмосфера да соған ыңғайлы жағдай жасап тұрғаны жақсы», – дейді кішкентай блогерлердің продюсері Әмина Қадылбекқызы.TikTok-та бүгінде тек мектеп оқушылары емес, салмақты ірі компаниялар мен ресми мекемелер де аккаунт ашып, танымал болуға ұмтылуда. Платформа аз ғана уақыттың ішінде нендей сиқырмен миллиондаған аудиторияны баурап алды дерсіз.
«Біріншіден, оның басты интерфейсі «рекомендациялар таспасынан» тұрады. Мұнда адам әрқашан өзі жазылмаған парақшалардың жаңа контентін көреді. Ал миға үнемі жаңа ақпаратпен танысып отыру ұнайды. Екіншіден, платформаның «рекомендациялар механизмі» өте мықты. TikTok-та небәрі екі апта отырып, белсенділік танытып, лайк қойып, пікір жазып, өзіңізге қызықты блогерлерге жазылсаңыз, таспаңыз сіздің қызығушылығыңызға тез-тез бейімделіп, қызықты контентке толады. Үшіншіден, мұнда видеотүсірілім оңай жасалады. TikTok-тың өзінің ішінде видеоредактор, түріңізді әдемі ететін фильтрлер мен небір ерекше эффектілер, субтитрлер – бәрі-бәрі бар», – дейді диджитал медиа саласының маманы Абзал Қабылбек.Қысқасы, осы мүмкіндіктерді пайдаланып, біздің жасөспірімдер де өздерінің жұртқа ұсына алар дүниесін цифрлық өнім түрінде беріп жатыр. TikTok – соған қолайлы алаң ғана.
Ботагөз МАРАТҚЫЗЫ