«AMANAT» партиясы Ордабасы ауданы бойынша сайлауалды бағдарламасын орындау жөніндегі Жол картасы аясында 2021-2025 жылдары өңірдегі 25 елді мекенге газ құбырын тарту жоспарланған. Биыл аудандағы Қажымұқан ауылдық округіне қарасты Боралдай және Қызылсеңгір ауылдары көгілдір отынға қол жеткізді.
Ауыл тұрғындарының қуанышын бөлісуге келген аудан әкімі Нұрбек Бадырақов тиісті жұмыстар қазан айына дейін аяқталып, халыққа мерзімінде газ беріліп отырғанын жеткізді.
«Ауданға әкім болып тағайындалған кезде 57 елді мекеннің барлығын аралап шықтым. Ауылдарда жүзеге асырылуы тиіс мәселелерді сондағы тұрғындармен бірге талқыладық. Солардың бірі, елді мекендерді газбен қамту мәселесі болатын. Боралдай мен Қызылсеңгірге қазан айына дейін газ беріледі деп уәде берілген еді. Бүгін сол сәт туып, қуаныштарыңызға ортақтасып отырмыз, – деді аудан басшысы.
Боралдай елді мекенінде 80-ге тарта үй бар, онда 500-ге жуық тұрғын өмір сүреді. Ал 57 тұрғын үйі бар Қызылсеңгір ауылында 400-ден астам халық тұрады. Жалпы Ордабасы ауданындағы 57 елді мекеннің төртеуі ғана, яки 17 пайызы табиғи газбен қамтылған. Келесі жылы бұл көрсеткішті 45 пайызға жеткізу жоспарлануда.
