Өз шаруашылығында энергия үнемдеп, жаңартылған энергия көздерін пайдаланатын қазақстандық фермерлер БҰҰ Даму бағдарламасы аясында қаржылай қолдау алу мүмкіндігіне ие. Атап айтқанда, жаһандық ұйым «Жасыл» жобаларды жандандырған кәсіпкерлердің алған несиесінің 25-40 пайызын субсидиялайды.
«Атамекен» Ұлттық кәсіпкерлер палатасында БҰҰ Даму бағдарламасының қолдау шаралары туралы айтылды. Онлайн-семинарға еліміздің түкпір-түкпірінен фермерлер қатысты.
«Энергия бағасының өсуін, энергия үнемдеудің маңыздылығын ескере отырып, бұл бағыттың перспективасы жоғары деп санаймыз. Тұтастай алғанда, біздің табиғатымыздың биоалуантүрлілігін сақтау маңызды. Сол себепті мұндай бастамаларды қолдаймыз», – деді кәсіпкерлер палатасы агроөнеркәсіп кешені департаментінің директоры Ербол Есенеев.
Қаржылай қолдау бағдарламаларының мүмкіндігін жеке кәсіпкерлер, заңды тұлғалар және шаруа қожалықтары пайдалана алады. Негізгі үш жоба аясында үш бірдей қаржылай қолдау бағдарламасы бар.
«Екінші бағыт – Көміртекті дамуы төмен тұрақты қалалар. Бұл энергияны үнемдейтін кәсіпкерліктерге бағытталған. Мысалы, жарықты алмастыру, ғимаратты жылыту, автоматтандырылған жылу пункттерін орнатуда ЖЭК пайдаланатын шаруалар ала алады. Үшіншісі, бұл да энергияны үнемдеуге бағытталған, тек субсидия ұсынуда айырмашылығы бар», – деп түсіндірді Ерлан Дайырбеков.
Қорыта айтсақ, шаруа екінші деңгейлі банктен ЖЭК пайдаланатын кәсібі үшін несие алады. Содан кейін БҰҰ Даму бағдарламасының субсидиясын пайдалану үшін оны «Даму» қорына ұсынады.
