Биыл Алтайдың ауданаралық ауруханасына 12 дана жаңа медициналық құрал-жабдық сатып алынды. Бүгінде оларды аурухананың бөлімшелері мен емханалар арасында бөліп, халық игілігіне пайдаланып жатыр. Медициналық құрал-жабдықты жаңартуға 223 млн теңгеге жұмсалды.
– Бөлінген қаржының басым бөлігі, яғни 118 млн теңгеге рентген кабинетін жабдықтау мақсатында сандық рентген құрылғысы алынды. Заманауи құрылғы емхананың бірінші қабатына қойылды. Ал қалған қаржы 11 құрылғыға жұмсалды, – деді Алтай ауданаралық аурухананың бас дәрігері Олжас Нұрекенов.
Сонымен қатар жаңа медициналық құрылғы перзентханаға да қойылған. Енді жарық дүниеге келген нәрестелерге аудио скрининг жасауға болады. Соның арқасында жаңа туған сәбидің есту қабілетін бірден анықтауға мүмкіндік туды.
Акушер-гинекологтардың кабинетіне кардиотокография құрылғысы орнатылды. Аяғы ауыр келіншектерді қабылдау кезінде іштегі нәрестенің жүрек қағысын, оның қимыл-қозғалысы мен белсенділігін үзіліссіз бақылап отырады.
Оған қоса, операциялық бөлмелер, хирургиялық және травматология бөлімдеріндегі ота жасайтын үстелдер мен шамдар қайта жаңартылды. Әйтпесе, бұған дейін жергілікті дәрігерлер ота жасағанда 1960 жылы шығарылған шамдармен жұмыс істеген. Осының арқасында емхананың медициналық сапасы арта түсті.
– Көз дәрігерінің кабинеті жаңартылды. Бұрыннан қалған Ситцевтің кестесінің орнына белгілерді көрсететін проектор қойылды. Сонымен бірге көз дәрігеріне ең қажетті құрылғы автокераторефрактометр алынды. Осы арқылы емделушінің көру қабілетінің бұзылуы қаншалықты екенін бірден анықтай алады, – деді Олжас Нұрекенов.
Аурухана басшысы алдағы жылдары басшылықтың қолдауымен емхананың екінші және үшінші қабаттарына жөндеу жұмыстарын жүргізуді жоспарлап отыр.
