Ақмола облысында Астрахан ауданында жанжал кезінде әйел адам танысының мұрнын тістеп, жұлып алған. Зардап шегуші енді пластикалық ота жасатуға мәжбүр, - деп хабарлайды Aikyn.kz порталының тілшісі.
Оқиға 15 қараша күні Астрахан ауданында болған. Аудандық полиция бөліміне жергілікті тұрғын әйел жүгінген. Оның айтуынша, таныс келіншек оның тұмсығын тістеп, қан-жоса еткен.
«Тәртіп сақшылары әйелдер арасында жанжал шығып, арты бір-біріне жұдырық ала жүгірумен тынған. Зардап шегушінің бетінен бірнеше жерден жарақат алған», - дейді Ақмола облысы Полиция департаменті баспасөз қызметінің жетекшісі Гүлнәр Пинчук.
Полиция бөлімі аталған факт бойынша Қылмыстық кодекстің 106-бабы 1-тармағы «Денсаулыққа қасақана ауыр зиян келтіру» бабы бойынша сотқа дейінгі тергеу амалдарын бастаған.
Қылмыстық іс қозғауға сот-медициналық сараптамаларының қорытындысы мен жәбірленушінің мұрны басының жұлынуы, бетіне жарақат алынуы негіз болған. Сараптама нәтижесі жәбірленушінің бет-әлпеті қалпына келмейтін етіп бұзылғанын және хирургиялық әрекет қажеттігін көрсеткен.
