Алматы қаласы бойынша Қазақстан президенті сайлауының барысын жариялау жөніндегі баспасөз орталығының алаңында бақылаушы, Франция Республикасының сенаторы, Еуропалық істер жөніндегі тұрақты комитет төрағасының орынбасары, Заңнама жөніндегі тұрақты комитеттің хатшысы Андре Марсель Рейшардың қатысуымен баспасөз конференциясы өтті.
«Қазақстан Еуропалық одақтың қызығушылығын тудырады, өйткені Ресей Федерациясы мен Қытай Халық Республикасы сияқты ірі елдермен көршілес орналасқан», – деді спикер.
Ол Қазақстан қазір дамудың өте маңызды кезеңінен өтіп жатқанын атап өтті.
«Президент Тоқаев сайлау өткізуді қамтамасыз ету бойынша қажетті шаралар қабылдады. Ол өзінің Жол картасын – Әділетті Қазақстанды дамытуға және құруға бағытталған бағдарламаны ұсынды және сайлау құқығының толық сақталуын қамтамасыз етуге ниет білдірді. Қазір Қазақстан халқы дауыс беру арқылы елдің болашағы туралы өз шешімін қабылдауда», – деп атап өтті спикер.
Андре Марсель Рейшар таңертең Алматыдағы төрт сайлау учаскесіне барып үлгергенін, түстен кейін тағы сонша сайлау учаскесіне баруды жоспарлап отырғанын айтып өтті.
«Мен бүгінгі сайлау процесінің өтуін қалыпты деп бағалаймын. Барлығы қалыпты режимде жүріп жатыр. Егер сайлаушының аты тізімнен табылмаса, ол дауыс бере алмайтыны өте маңызды. Ең бастысы, принципті сақтау үшін бәрі жасалуда: бір сайлаушы – бір дауыс», – деді спикер.
