Астананың ономастикалық комиссиясының кезекті отырысы өтті. Комиссия отырысының күн тәртібіне әл-Фараби даңғылының атауын көшіру мәселесі қойылды.
Бұған дейін елордадағы «Алматы» және «Байқоңыр» аудандарында орналасқан Ақжол, Вишневская және Байырқұм көшелері біріктіріліп, әл-Фараби даңғылы болып өзгертілген болатын. Қала тұрғындары, Астана қалалық мәслихаты мен Қоғамдық кеңес мүшелері, ғалымдар, зиялы қауым өкілдері бұл көше өндірістік аймақта орналасқандықтан, ұлы ғалымның есіміне сәйкес келмейтінін айтқан. Және осыған байланысты қаланың үлкен және орталық көшелерінің біріне екінші ұстаздың есімі берілуі керек деген ұсыныстарын да жеткізген.
– Астана қаласы ономастикалық комиссиясының жұмысын жіті бақылап отыратындардың бірімін. Соңғы жылдары комиссияның атқарған қызметтері көңіл қуантатынын қала әкімі Алтай Көлгіновтің Қоғамдық кеңес мүшелерімен кездесуінде де тілге тиек еткенбіз. Сол жиында Тіл басқармасының жұмысына жоғары баға беріп, сонымен қатар «әттеген-ай» дейтін мәселені де көтергенбіз…Солардың қатарында әлемге әйгілі Әбу-Насыр әл-Фараби атындағы көше қала шетіндегі өндірістік аймақта болуы көңілге кірбің келтіретін сөз етіп, оны орталықтағы көшелерге ауыстыру керегін айтқан едік. Міне, енді қалалық ономастикалық комиссияның кезекті отырысында осы мәселе арнайы қаралып, әл-Фараби даңғылының атауын орталыққа көшіру туралы шешім қабылданғаны жайлы жағымды хабарлар әлеуметтік желілер арқылы жеткізілуде.
Шынында, қала тұрғындарының ой-пікірлері ескерілгені жөн болған екен. Президентіміз Қасым-Жомарт Тоқаевтың «Халық үніне құлақ асатын мемлекет» тұжырымдамасының шын мәнінде жүзеге асып жатқанының жарқын көрінісі деп қабылдаймын.
Ғылыми жұртшылық өкілі ретінде елордамызда туған тіліміздің тарландары академиктер Әбдуәлі Қайдаров, Шора Сарыбаев, Рабиға Сыздықова мен Өмірзақ Айтбаевтың атындағы көшелер де бой түзесе, құба- құп болар еді деген көпшілік пікірін де ономастикалық комиссия мүшелерінің назарына сала кеткім келеді, – деді академик Кәрімбек Құрманәлиев.
Астананың ономастикалық комиссиясының отырысына Есіл ауданында орналасқан №38 жобалық атауы бар көшеге ұлы ғалым Әл-Фарабидің есімін беру туралы шешім қабылданды. Бұл көше Тәуелсіздік даңғылындағы салынып жатқан көпірдің артында орналасқан.
Қаланың болашақ жоспарына сәйкес бұл көше Есіл өзенінен басталып, жалпы ұзындығы 7 шақырымнан асатын Қабанбай батыр даңғылына дейін созылатын үлкен даңғылдардың бірі болады.
Қаланың ономастикалық комиссиясының отырысында қаралған ұсыныстар Астана мәслихатының тұрақты комиссияларының жария тыңдауларына, Астана қоғамдық кеңесінің қарауына жіберіледі.
Қаланың болашақ жоспарына сәйкес бұл көше Есіл өзенінен басталып, жалпы ұзындығы 7 шақырымнан асатын Қабанбай батыр даңғылына дейін созылатын үлкен даңғылдардың бірі болады.
Қаланың ономастикалық комиссиясының отырысында қаралған ұсыныстар Астана мәслихатының тұрақты комиссияларының жария тыңдауларына, Астана қоғамдық кеңесінің қарауына жіберіледі.