«AMANAT» партиясы Қостанай облыстық филиалы жанындағы Miras аймақтық қоғамдық кеңестің отырысында «Әділетті қоғам: жаңа қоғамдық сананы қалыптастыру» тақырыбы талқыланды.
Қоғамдық кеңес төрайымы, Қостанай облыстық мәслихатының депутаты Қырмызы Жанбыршина үлкен өзгерістерге қадам басқалы тұрған тұста жауапкершілік жүгі қоғамның әрбір мүшесіне жүктелетінін баса айтты.
«Бүгінде Президентіміз Қасым-Жомарт Тоқаевтың еліміздің қарқынды дамуына, халықтың әлеуметтік жағдайын көтеруге, әділетті әрі құқықтық қоғамды құру жолында көптеген реформалар жариялады. 20 қарашада өткен сайлаудағы Қасым-Жомарт Тоқаевтың айқын жеңісі – ол қоғамның Президентке және оның реформалар бағытына деген зор сенімінің көрсеткіші. Қоғамда жаңа құндылықтар орнықтырып, жақсы қасиеттерге ие бола алмасақ, реформаның бәрі бекер. Сондықтан Президент жариялаған бастамаларды іске асыру жолында еліміздің әрбір азаматы өз үлесін қосуы қажет», – деді ол.
Талқылау барысында, коғамдық кеңестің мүшелері Әсия Беркенова, Қалқаман Жақып, Жанұзақ Аязбеков, Оразалы Жақсанов, Әлмұрат Ахметов, Қостанай облысы Мәдениет басқармасының басшысы Ерлан Қалмаков, «AMANAT» партиясы Қостанай облыстық филиалы Атқарушы хатшысы Бибігүл Аққожина, «Қостанай таңы» газетінің Бас редакторы Кенжеш Аманова өздерінің келелі ой, кесек пікірлерін айтты.
Отырыстың екінші мәселесі бойынша «Қазақ тілінің қолданыс аясын кеңейту жөніндегі ісжоспар» туралы кеңес мүшесі, Қазақстан Жазушылар одағының мүшесі Әбутәліп Әмір баяндама жасады.
«Биылғы тамыз айынан бастап Miras кеңесінің мүшелері мен тіл жанашырлары тарапынан қазақ тілінің қолданыс аясын кеңейту жөнінде ұсыныстар жинақталып, бір жылдық жоспар жасалды. Жоспар бойынша Miras кеңесінің мүшелері ұсынған Қостанай қаласындағы кәсіпорындар мен мекемелер сұрыпталып, олардың ішінен 28 ұйым бөлініп алынды. Осы ұйымдарда жұмыстар кеңірек жүргізілетін болады», – деді ол.
Кеңес мүшелері баяндаманы талқылап, ұсыныстар мен толықтыруларды ескере отырып, «Қазақ тілінің қолданыс аясын кеңейту жөнінде ісжоспарын» бекітті.
