Жексенбі күні Қазақстанға АҚШ-тың Мемлекеттік хатшысы Майкл Помпео ресми сапармен келді. Қазақстан Президенті Қасым-Жомарт Тоқаев мәртебелі мейманды «Ақорда» резиденциясында қабылдады.
Мемлекет басшысы америкалық дипломатқа ілтипат білдіріп, екі ел арасында дипломатиялық қарым-қатынас орнаған кезден бастап екіжақты ықпалдастықты дамытуда мол табысқа қол жеткізілгенін атап өтті.
– Америка Құрама Штаттары – Қазақстанның тәуелсіздігін алғашқылардың бірі болып мойындаған ел. Біз бұл тарихи фактіні үнемі есімізде ұстаймыз. Мемлекеттеріміз арасында көптеген бағыт бойынша, оның ішінде ядролық қаруды таратпау, халықаралық терроризммен күрес және экономикалық ынтымақтастық секілді салаларда тығыз қарым-қатынас орнаған. Сонымен қатар өзара ықпалдастығымызды одан әрі дамыту мақсатында пайдалануға болатын әлеуетіміз де бар, – деді Қазақстан Президенті.
Қасым-Жомарт Тоқаев Нью-Йорк қаласында өткен БҰҰ Бас Ассамблеясының 74-сессиясы кезінде АҚШ Президенті Дональд Трамппен кездескенін атап өтіп, Америка көшбасшысына өзінің сәлемін жолдады. Сондай-ақ Қазақстан Президенті америкалық әріптесімен әлемнің кез келген жерінде кездесуге дайын екенін, дегенмен бұл жүздесудің Қазақстанда өткенін жөн санайтынын айтты.
Айта кету керек, М.Помпеоның қазақ еліне жұмыс сапарымен келуі өте маңызды рөл атқарады, себебі АҚШ Мемлекеттік хатшысы елімізге соңғы рет осыдан бес жыл бұрын келген. Сондықтан бұл сапардың Қазақстан үшін де, АҚШ үшін де маңызы үлкен. Ол жөнінде Қазақстан Президентімен кездесу барысында Майкл Помпео да айрықша тоқталып, Американың Орталық Азияға қатысты жаңа стратегиясының негізгі ережелері туралы мәлімет берді.
Қасым-Жомарт Тоқаев С5+1 (Орталық Азиядағы бес ел + АҚШ) диалогы форматының маңызды екенін атап өтіп, 3 ақпанда Ташкентте өтетін кезекті отырысының табысты болатынына сенім білдірді.
Тараптар барлық бағыт бойынша, оның ішінде сауда, инвестиция, IT-технология, демократиялық құндылықтарды ілгерілету және халықаралық терроризмге қарсы іс-қимыл салаларындағы екіжақты байланыстарды тереңдетудің маңызын атап өтті.
Мемлекет басшысы Қазақстанда Ауғанстан бойынша арнайы өкіл лауазымын ашуға ниетті екенімізді айтты.
АҚШ-тың сыртқы саяси ведомствосының басшысы Қазақстан Президентіне қонақжайлылық көрсеткені үшін алғысын айтып, екі елдің экономика, халықаралық бейбітшілік пен тұрақтылықты сақтау бағыттарында дәстүрлі әрі сенімді серіктестік қалыптасқанын жеткізді.
– Біздің экономикалық байланыстарымыз өте жақсы. Екі ел арасында тікелей әуе қатынасын ашу мүмкіндігі қарастырылуда. Энергетикалық бағыттағы ынтымақтастықтан бөлек, басқа да салалардағы байланыстарды өркендету үшін әлеуетіміз зор. Президент Дональд Трамп сізге сәлем жолдады. Бүгін осында өзіңізбен кездескеніме қуаныштымын, – деді Майкл Помпео.
Сондай-ақ америкалық дипломат Қазақстанның «Жусан» операциясы аясында Таяу Шығыстағы қақтығыс аймағынан өз азаматтарын қайтарып алғанын жоғары бағалады. Еліміздің Ауғанстанда бейбітшілік орнатуға, оның экономикасы мен адами әлеуетін күшейтуге қосқан үлесіне тоқталды.
Майкл Помпео Қазақстанда қолға алынған саяси реформалар жайында да жылы пікірін айтып, оның іске асуына сәттілік тіледі. Сонымен қатар тараптар өңірлік және жаһандық күн тәртібіндегі өзекті мәселелерді талқылады.
Қасым-Жомарт Тоқаев пен Майкл Помпео Әуе қатынастары туралы үкіметаралық келісімге қол қойылғанын құптады. Аталған құжат «ашық аспан» қағидаттарына жауап береді, сондай-ақ Қазақстан мен АҚШ арасында тұрақты әрі тікелей әуе рейсін ашу үшін құқықтық негіз қалады.
