7 сәуір мен 1 мамыр аралығында Астанадағы St Regis қонақ үйінде шахматтан әлем чемпионы атағы үшін матч өтеді.
Онда Әлем чемпионы атағына Ян Непомнящий (ФИДЕ) және Дин Лижень (ҚХР) таласады. Бұл спортшылар халықаралық шахмат федерациясының (ФИДЕ) әлемдік рейтингінде екінші және үшінші орындарды иеленеді: Ян Непомнящийдің рейтингі – 2793 болса, Дин Лиженьнің рейтингі – 2788. Қандай нәтиже болса да бұл матч 17-жаңа шахмат тәжінің иегерін анықтайды.
Астанада өтетін әлем чемпионаты алғашқы 40 айналымға 120 минут, келесі 20 айналымға 60 минут және 61-айналымға 30 секунд қосып, қалған айналымдарға 15 минут уақыт бақылауымен 14 партиядан тұрады. Тең есеп болған жағдайда қарсыластар рапидтан плей-офф ойнайды.
Әлем чемпионатына ФИДЕ президенті Аркадий Дворкович, шахматтан 14-әлем чемпионы Владимир Крамник, шахматтан 15-әлем чемпионы Виши Ананд, әйелдер арасындағы шахматтан 4 дүркін әлем чемпионы Хоу Ифань, сондай-ақ гроссмейстерлер – Даниил Дубов, Виорел Бологан, әйелдер гроссмейстері, Латвияның бұрынғы экономика министрі және қаржы министрі Дана Рейзнице-Озола сияқты бірқатар атақты қонақ келеді деп күтіліп отыр.
Чемпионат аясында қонақтар бір мезгілде семинарлар мен ойын сеанстарын өткізеді. 2023 жылғы әлем чемпионатын өткізу барысында Қазақстан Республикасы мен әлемнің әйелдер құрама командалары (рапид және блиц) арасында халықаралық матч өтеді, сондай-ақ 14 жасқа дейінгі ұлдар мен қыздар арасында Future World Champions 2023 I кезеңі өтеді. Бұл кезең 2023 жылғы Қазақстан Республикасы балалар Кубогының финалына қатысатын үміткерлерді анықтайды.
«Алдағы әлем чемпионаты – шахмат әлемі үшін де, Қазақстан үшін де маңызды оқиға. Қазіргі уақытта елімізде шахмат трендте. Біз шынымен де қызығушылықтың артып келе жатқанын байқаймыз. Осыған байланысты Қазақстан жас ұрпақ үшін шахматты дамытудың бағдарламасын қабылдады. Қазір Федерация алдында шахматты түбегейлі жаңа деңгейге көтеру, жас шахматшыларға керемет мүмкіндіктер жасау және жаңа таланттардың іргетасын қалау міндеті тұр», – деп атап өтті Қазақстан Шахмат федерациясының президенті Тимур Турлов.
