Біз тілге тиек еткен ақсақал Аққоян Рсалиев Қызылорда облысына қарасты Қазалы ауданында тұрады. Ол ұзақ жылдар бойына теміржол саласында қажырлы еңбек еткен. Бала кезінен жүгіруге жаны құштар болып өскен. Оқушы кезінде бокспен де айналысқан.
Аққоян ақсақал әуе-десант әскері қатарында Отан алдындағы борышын абыроймен атқарыпты. Сол уақытта да әуеден парашютпен 281 рет секіріп, бәрін таңғалдырумен болған. Осылайша, оның ептілігі әскер қатарында жүргенде байқалса керек.
Саналы ғұмырында салауатты өмір салтын ұстанып келе жатқан қария күніне 12 шақырым жүгіруді әдетке айналдырған. Бұдан өзге ардагерлер арасында өткізілетін шахмат, дойбы, нысана көздеу және жүгіру жарыстарына тұрақты түрде қатысып келеді. Талай бәйгеде жүзден жүйрік шығып, жүлделі орындардан көрініп те жүр.
«Өзім жайында айтар болсам, Арал ауданы, Бекбауыл стансасында дүниеге келгенмін. Теміржолда адал еңбек етіп, саланың дамуына шама-шарқымша елеулі үлес қостым деп айта аламын. Бүгінде Қазалы аудандық ардагерлер кеңесінің мүшесі, ауданның құрметті ардагері атандым. Аудандағы «Ұстаз жолы» қорының мүшесімін. Әлі күнге қоғамдық жұмыстардан қол үзген емеспін. Бұл жастайымнан спортпен шұғылданып, салауатты өмір салтын ұстануымның пайдасы деп білемін. Бала кезімнен спортқа қызығушылығым зор болды. Жыл сайын Алматыда өтетін марафонға тұрақты түрде қатысып келемін. Жүгіру менің жаныма сергектік сыйлайды», – дейді бізге желаяқ ақсақал.
Аққоян ақсақал елімізде өткен түрлі жарыстарға қатысып, топ жарып жүр. Қазалы ауданының мақтанышына айналған қарияға ауылдастарының құрметі де ерекше. Бүгінде өзіне еліктеген жастар да аз емес. Сондай спортқа еліктеген сайыпқырандарды жүгірудің қыр-сырына баулып, шәкірт тәрбиелеп отырғанын да жеткізді.
Спортқа бейім қария Түркия мемлекетінің Анталия қаласында өткен марафонға қатысып, жеңімпаз атаныпты. Мұны өз өміріндегі ең үлкен жетістігі деп санайды. Бұл халықаралық жарысқа жергілікті спортшылармен қатар, Франция, Германия және Қазақстаннан 80-ге жуық желаяқ қатысып, өзара бақ сынасады. Қария осы байрақты бәсекеде бәрінен оза шығып, алтын медальді қанжығасына байлап қайтқанын мақтанышпен жеткізді.
Спортшы қарияның алға қойған мақсаты да асқақ. Әлі де талай жарыстарға қатысып, ел абыройын асқақтата беруге ниетті. Жастарды спортқа баулып, салауатты өмірді жас ұрпақ жадында жаңғыртуды көздейді.
Ақсақалдың жалғыз арманы бар екен. Аудан орталығындағы барақ типтес ескі көпқабатты үйде тұратын Аққоян қария жайлы баспаналы болсам деген арманын жеткізді.
«Бүгінде кемпірім екеуміз аудан орталығындағы ескі көпқабатты үйде тұрамыз. Тым ертеректе салынған бұл тұрғын үйдің тозығы жетіп тұр. Күні бойына жүгіріп, терге малшынып келемін. Сондай сәтте пәтерімнің жуынатын бөлмесі де жоқ. Жергілікті әкімдікке осы жайында талай мәрте айтқаныммен еш қайран болмай тұр. Қартайған шағымызда жайлы баспанада тұруды армандаймыз. Бірақ өз күшімізбен үй сатып алуға мүмкіндігіміз болар емес», – деп сөз арасында мұңын шақты.
Көптеген жастарға үлгі-өнеге болып, республика көлемінде майталман спортшы атанған Аққоян ақсақал баспаналы болсам деген арманы ақиқатқа айналарына сенгісі келеді. Мемлекеттен қолдау күтетінін де жасырмайды.
Ақсақал 1988 жылы Қапал-Арасан шипажайында Дінмұхамед Қонаевпен кездескен сәтін де баяндап берді. Сол бір демалыс кезінде қайраткермен күніге екі мәрте жүгіріп, аз-кем дидарласқанын алға тартты.
Бүгінде ол Алматыда өткелі жатқан кезекті марафонға қызу дайындық жүргізіп жатыр екен. Сәтін салса, бұл марафоннан да жақсы нәтиже көрсетуге ниет білдіріп отыр.
Ербақыт ЖАЛҒАСБАЙ,
Қызылорда облысы