Облыстық Мәдениет басқармасы басшысының бөлім жетекшісі Дина Бейсембаеваның мәліметінше, соңғы 3 жылда республикалық және облыстық бюджет қаражаты есебінен 4,8 млрд теңге бөлініп, 1 мәдениет нысаны салынып, 78 нысан жөнделген. Зеренді мен Астраханкадағы аудандық мәдениет үйлері жөндеуден өткен. Былтыр ұзақ уақыт бойы пайдаланусыз тұрған Ерейментау ауданындағы Новомарков және Зеренді ауданындағы Айдабол ауылдық клубтары, Баратай ауылында жеке тұрғын үйге жөндеу жүргізіліп ауылдық клуб ретінде пайдалануға берілген. Жақсы ауданының Жаңақима ауылдық мәдениет үйінде күрделі жөндеу және Аршалы ауданының Тургенев ауылдық мәдениет үйінде күрделі жөндеу жүргізілген.
Биыл Щучинск қаласындағы аудандық мәдениет үйінің, Аршалы кентінде және Жібек жолы ауылында демалыс орталығының, Сандықтау ауданы Балкашино ауылындағы, Аршалы кентіндегі аудандық мәдениет үйі ғимаратының, Астрахан ауданының Новочеркасское ауылында, Степногорск қаласының Қарабұлақ ауылында, Бұланды ауданының Никольское және Вознесенка ауылдарында мәдениет үйлерінің құрылысы басталмақ.
Өңірімізге белгілі ірі тұлғаларға ескерткіштер орнатылып, бірқатар музейге реставрация жүргізілген. Ал тарихи мұраны қорғау және пайдалану орталығының директоры Жаслан Укеев аймақта жүріп жатқан археологиялық қазбалар мен тарихи кесенелердің жай-күйін баяндап, алдағы жоспарларымен бөлісті.
MIRAS қоғамдық кеңесінің мүшелері оқушылар арасында ескерткіштердің танымалдылығын арттыру, оқушыларды кітап оқуға баулу мәселесін көтеріп, мәдениет саласы қызметкерлерінің жалақысының төмен екенін алға тартты.
«Оқушыларды кітап оқуға баулу, тарихымызды білу, ұлттық сананы қалыптастыру жолында мәдениет қызметкерлерінің үлесі ерен. Ал бүгінде кітапханашы, археолог, музей қызметкері сияқты мамандықтардың мәртебесін көтеру – алдымен олардың жалақысын көтеруден басталады. Мәдениет саласы қызметкерлерінің жалақысын көтеру – уақыт күттірмейтін мәселе», – деді қоғамдық кеңес мүшесі, белгілі актер, Ш.Құсайынов атындағы облыстық қазақ музыкалық драма театрының директоры Жарас Қалдаров. Мәселенің өзектілігімен келіскен қоғамдық кеңес мүшелері бірқатар ұсынысты жинақтап, тиісті мемлекеттік органдарға жолдады.
Нұрлан ОРАЗҒАЛИЕВ