Түзетулер арнайы мемлекеттік органдарда қызмет ету мәселелерін де реттейді. Мәжілістің Халықаралық істер, қорғаныс және қауіпсіздік комитетінің төрайымы Айгүл Құспанның айтуынша, 2 кодекс пен 11 заңға түзетулер енгізіледі.
«Заң жобасы қорғаныс-өнеркәсіптік кешен ұйымдарын, оларды жекешелендірілген күннің өзінде, стратегиялық объектілер қатарына жатқызуды, сондай-ақ қорғаныс және қауіпсіздік мұқтажы үшін қажетті тауарлар мен қызметтерді сатып алу кезінде сыбайлас жемқорлық тәуекелдерін болдырмауды көздейді. Арнаулы мемлекеттік органдарда қызметтік тәртіп үшін жауапкершілікті тек жеке-дара бірінші басшыларға ғана емес, барша бөлімше басшысына жүктеу ұсынылады», – деді А.Құспан.
Сондай-ақ Мәжіліс Үкімет пен Жоғарғы аудиторлық палатаның 2022 жылға арналған республикалық бюджеттің атқарылуы туралы есебін және жаңа заң жобаларын жұмысқа қабылдады. Олар –онлайн-платформалар мен онлайн-жарнама туралы түзетулер мен Еуразиялық қайта сақтандыру компаниясын құру туралы ратификациялық келісім.
Сонымен қатар ақылы көлік тұрақтарын қадағалайтын мемлекеттік операторды құру мүмкіндігін қарастыру туралы Мәжіліс депутаты Самат Нұртаза Үкімет басшысының бірінші орынбасары Роман Склярдың атына сауал жолдады.
«Қазіргі кезде еліміздің ірі қалаларында ақылы көлік тұрақтары қаптап кетті. Бастапқыда аталған көлік тұрақтары көшелердегі көлік ретсіздігін шешуге бағытталғанымен, түптеп келгенде мәселе шешілмеді, керісінше әлеуметтік наразылыққа негіз болар сұрақтар бар. Біріншіден, автотұрақтарды орналастыру мәселесіне тоқталсам, іс жүзінде мегаполистердегі бұл нарықты бірнеше оператор монополияландырып алған. Олар алғашында адам көп баратын орталық және іскерлік аудандарда ақылы тұрақтарды аша бастады. Алайда 2021 жылы тек Астана қаласында ақылы тұрақтар саны 20 есеге артқан. Ақылы автотұрақтарға коммерциялық орталықтар, қоғамдық орындар, сондай-ақ құрылыс нормалары мен қағидаларды бұза отырып, әлеуметтік объектілерге келетіндерге арналған жерлер берілді. Тұрғындары тиісті кондоминиум рәсімдеп үлгермеген тұрғын алаптары мен аудандарда да ақылы тұрақтар пайда бола бастады», – деді С. Нұртаза.
Осы айтылған жағдайға қатысты ақылы автотұрақтарды көлік ең көп жиналатын жерлерде ғана қалдырып, олардың санын қайта қарап, қысқарту ұсынылды.
«Ақылы көлік тұрақтарын қадағалайтын мемлекеттік операторды құру мүмкіндігін қарастыру немесе мемлекет пен жекеменшік сектордың серіктестігі туралы шарттардың талаптарын қайта қарап, жекеменшік серіктестерге берілген аумақтарды күтіп ұстау қызметін жүктеу өзекті. Жеке адамдар мен ақылы автотұрақтардың жекеменшік операторы арасындағы шарт талаптарын бұзғаны үшін айыппұл өндіру рәсіміне құқықтық баға берілуін сұраймыз», – деді С. Нұртаза.
Ал Мәжіліс депутаты Бақытжан Базарбек жер саласындағы сыбайлас жемқорлықпен күрестің жаңа тәсілдерін енгізуді ұсынды.
«Жер реформасын бастау және негізгі бағыты ретінде жер саласындағы олигополиядан шынайы арылу керек. Жер саласындағы монополиялардың қалыптасуына құқықтық жолмен тойтарыс беруіміз қажет. Ауыл шаруашылығы жерлеріне заңсыз ие болғандар оны игермей, дереу сатуға, не банкке кепілге қоюға тырысатын. Екі ортада сыбайлас жемқорлықтан қарапайым халық және мемлекеттің мүддесі зардап шегеді. Сондықтан, алдағы уақытта жер саласында халық үшін түбегейлі реформа қажет. Реформаның негізгі мақсаты халықтың жер қатынастарында құқықтарын күшейту және мемлекеттік қорғау болу керек», – деді Б. Базарбек Мәжілістің жалпы отырысында Премьер-Министрдің орынбасары - Сауда және интеграция министрі Серік Жұманғариннің атына жолдаған сауалында.
Оның пайымынша, жер кадастрының және ауыл шаруашылығы мақсатындағы жер иелері аты-жөндерінің ашықтығын қамтамасыз ету қажет. Мыңдаған гектар жердің иелерін жариялау керек.
«Екіншіден, жерге бақылау жасайтын мемлекеттік орган әкімге де, ауыл шаруашылығы министрлігіне де бағынбайтын, Үкімет құрамына кіретін дербес орган – жер ресурстарын басқару агенттігін құру мыңызды. Үшіншіден, мемлекеттік жер кадастрын бір қолға, яғни цифрлық даму министрлігінен жер ресурстарын басқару агенттігіне беру қажет», – деді депутат.