– Ең бірінші, жеңісіңізбен құттықтаймыз! Сізді әлем чемпионатында бокстан ұлттық құраманың капитаны ретінде таныдық. Жалпы, команда капитаны ретінде сіздің жауапкершілігіңізге нелер кірді?
– Иә, біреулер команда капитаны, енді біреулер құрама лидері деп сенім артты. Бұл жердегі менің міндетім –команданы бірлікте ұстау. Бокс топтық ойын емес. Әр ойыншы өз жеңісі үшін жеке күреседі. Бірақ команданың тұтастығын сақтап, боксшыларды жігерлендіру маған артылған үлкен жауапкершілік болды. Себебі бас бапкерлеріміз құраманың жағдайын менен сұрайды. Мен жігіттерге жігер беріп, команданы алға жетеледім. Туындаған сұрақтар мен мәселелерді қадағалау да менің міндетімде болды.
– Чемпионатты басынан аяғына дейін тамашаладық. Медаль күткен кейбір боксшыларымыз алғашқы айналымдардан сүрінді. Мүмкін, бақ та жетіспеген шығар. Дегенмен спортшы ретінде жарыстың ұйымдастырылуына қандай баға бересіз?
– Ұйымдастырылу жағы жоғары деңгейде болды. Орналасқан қонақүйіміз, ондағы тамақ, қызмет көрсету барлығы көңілімізден шықты. Бұл әлем чемпионаты ең көп спортшы қатысқан чемпионат ретінде тарихта қалды. Себебі чемпионатқа Англия мен Америкадан басқа 104 мемлекеттен 600-ден аса былғары қолғап шебері қатысты. Қарсыластарымыз да көп болды. Бәріміз бес кездесуден өткіздік.
– Ал төрешілер әділ болды ма? Себебі біздің бокс федерациясы Халықаралық бокс федерациясының (IBA) президенті Умар Кремлевтің атына Сәкен Бибосыновтың жекпе-жегіндегі төрешілердің даулы шешіміне қатысты ресми шағым жолдады ғой.
– Біздің көзқарасымыз бойынша Сәкен Бибосынов жеңіске жетіп тұрды. Егер мен төрешілердің орнында болсам, дауысымды Сәкенге беруші едім. Бірақ әлем чемпионатындағы төрешілердің шешімі басқаша болды. Біз ол шешімге қарсы шыға алмаймыз.
– Араға он жыл салып, ұлттық құрама 2013 жылғы нәтижесін қайталады. Қоржынымызға 4 бірдей алтын салдыңыздар. Бұл сіздер үшін күтпеген жеңіс болды ма? Әлде алтын алатындарыңызға сенімді болдыңыздар ма?
– Шыны керек, бәріміз бірінші орын аламыз деп бардық. Әлем чемпионатына жолдама алған боксшымыздың барлығы «чемпион боламын» деп өз-өзіне сенімді еді. Дегенмен бұйырғаны осы болды. Ешкім жарысқа жеңілемін деп барған жоқ.
– Бұл сіз үшін көптен күткен жеңіс болды. Спорт сарапшылары, олимпиададан кейін карьераңызды аяқтайды деп те болжам жасауда. Өзіңізден сұрасақ. Бұйырып, олимпиададан жүлде алсаңыз, спорттағы мансабыңызды аяқтайсыз ба?
– Ол туралы әлі ештеңе ойланған жоқпын. Қазіргі негізгі мақсатым – олимпиадаға дайындалу. Одан кейін бұйырғанын көреміз.
– Ал олимпиадаға дайындық қалай? Басталып кетті ме?
– Қазір демалып, чемпионаттан алған жарақатымызды емдеп жатырмыз. Ары кетсе, 2-3 аптадан кейін дайындықты қайта бастаймыз.
– Бокстан ұлттық құрамада спорттық медицинаның жоғары дамығанын білеміз. Сіздің ойыңызша, жақсы нәтиже көрсетулеріңізге осы фактор да әсер етті ме?
– Әрине,біздің құрамада боксшыларға барлық жағдай жасалған. Жейтін тамағымызға дейін дәрігерлермен ақылдаса отырып таңдаймыз. Мысалы, мен салмақ ұстайтын болсам, жегім келіп тұрған тамақтарды мәзірге енгіземін. Соны аспаздар күн сайын дайындап, беріп отырады. Дәрігерлер ай сайын пайдалы витаминдер береді. Айта кету керек, олардың құрамында ешқандай допинг жоқ. Медициналық тұрғыда бекітілген дәрумендер. Командада 2 массаж маманы, дәрігерлер мен психологтер бар. Барлығы өз ісінің білікті мамандары. Біздің жүрегімізді тексеретін физиолог бар. Әр күні жаттығудан кейін кешке бізден қан алады. Солай біздің жағдайымызды бақылайды. Жағдайы нашарлап, көп жаттығу жасап қойған боксшы-ларды уақытылы демалдырады.
– Әлем чемпионатында сізге ең қиын қарсылас кім болды?
– Қарсыластарымның барлығы оңай болған жоқ. Соның ішінде өзбек боксшысы мықты қарсылас болды.
– Жалпы сіздің бокстағы жолыңыз қашан, қалай басталды? Еске түсіріп көрейікші.
– 2005 жылы мен Үлгілі деген жерде, Еламан Қазыбеков деген бапкерден ең алғаш боксты үйреніп бастадым. Бір жылдан кейін отбасымыз Байзақ ауылына көшіп кетті. Содан тек 2007 жылы бапкер Болат Жарымбековке келіп жаттықтым. Сол кездерде Қазақстанның спорт шебері деген атаққа ие болдым. 11-сыныпқа дейін сол кісіде жаттықтым. Қалаға оқуға түскеннен кейін қазіргі жаттықтырушым Ермек Ертаевқа жолықтым. Әлі күнге дейін, 13 жыл бойы Ермек ағамен жұмыс істеп келеміз. Ол кісі екінші әкемдей болып кетті.
– Боксқа баруыңызға кім себепкер болды?
– Кішкентайымыздан Бақтияр Артаевты көріп, сол кісідей чемпион болуды армандадық. Бір күні боксқа ағам барып жүргенін біліп, «мені де апаршы» деп ілесіп алдым. Бірінші жаттығудан-ақ боксқа деген қызығушылығым пайда болды.
– Ал бос уақытыңызда немен айналысасыз?
– Бос уақытымда отбасыма көңіл бөлемін. Екі қыз, бір ұлым бар.
– Болашақта ұлыңыз сіздің жолыңызды қуамын десе, келісесіз бе?
– Егер балам өзі қалайтын болса, оған ешқашан «жоқ» деп айтпаймын.
– Елге келгелі халық та сіздерді ерекше ықыласпен қарсы алып жатыр. Халықтың қошеметіне ризасыздар ма?
– Әрине, халқымызға ризамыз. Ташкентте жүріп, артымызда үміт артып, сеніммен күтіп отырған еліміздің бар екенін шынайы сезіндік. Қаншама жанкүйерлеріміз біз үшін Өзбекстанға да барды. Әнұран бітіп қалған кезде де, бәріміз қосылып хормен айттық. Елге оралғаннан кейін де, көшеде болсын, таксиде болсын, барлығы келіп суретке түсіп, ризашылықтарын білдіріп жатыр. Спортшы үшін бұдан асқан жеңіс те, жетістік те жоқ.
– Алдағы жоспарларыңыз қандай?
– Азия, Олимпиада ойындарына дайындалу.
– Әңгімеңізге рақмет!
Сұхбаттасқан
Көктем ҚАРҚЫН