Биыл шығармашылық жарысқа жеті этностың 12 жас өкілі қатысты. Олардың барлығы жыраудың өмірі мен шығармашылығын зерттейді және оның кемінде он шығармасын жатқа оқи алады. Байқаудың ең ересек қатысушысы 45-те болса, ал ең жас қатысушысы 11 жаста.
Достық үйінде Бұқар жыраудың шығармалары түрлі тілде шырқалды. Ботақарадан келген 8-сынып оқушысы Виктория Аленина ақынның шығармаларын қазақ, орыс, беларусь және түрік тілдерінде жатқа оқып, «Бұқарекең жырлайды» атты облыстық поэзия байқауының бас жүлдесін жеңіп алды.
Қазылар алқасының мүшелеріне Ботақарадан келген Юрий Гагарин атындағы жалпы білім беретін мектептің 8-сынып оқушысы Виктория Аленинаның өнері ерекше әсер қалдырды. Қыз бала қазақ және орыс тілдерінде «Он бір тілек» және қазақ, орыс, беларусь және түрік тілдерінде «Асқар таудың өлгені» шығармасын жатқа оқыды.
– «Руханият» қосымша білім беру мектебінің «жыр-терме» домбыра сыныбында айналысамын. Біз әртүрлі ақын, жазушылардың, композиторлардың шығармашылығын зерттейміз. Маған, әсіресе Бұқар жыраудың шығармалары ұнайды. 10 шығармасын қазақ тілінде, төртеуін басқа тілдерде білемін, – дейді Виктория. – Поэзиядан басқа мен кітап оқумен, домбырада, укулеле мен гитарада ойнаумен, хореографиямен айналысамын. Болашақта Тәттімбет атындағы колледжге түскім келеді.
Қарағандының №15 жалпы білім беретін мектебінің 7-сынып оқушылары Анастасия Финонченко, Богдан Жученко және Валерия Лухманова түрлі номинация бойынша І орынға ие болды.
Балаларды байқауға қазақ тілі мен әдебиеті пәнінің мұғалімі Арайлым Смағұлова дайындады.
– Балаларға қазақ тілі мен әдебиетін үйретемін және олардың поэзияға деген қызығушылығын оятуға тырысамын. Менің тәрбиеленушілерімнің әрқайсысы конкурсқа қазақ тілінде 7-ден 12-ге дейін шығарма дайындады. Шығармалардың айтылуы мен түсінілуіне ерекше назар аударылды, – дейді Арайлым Смағұлова. – Балалар үшін бұл үлкен тәжірибе. Олар Бұқар жыраудың шығармашылығын үйреніп қана қоймай, қазақ тілін оның туындылары арқылы түсінуге үйренеді.
ІІ орынды Қарағандының №10 ЖББМ оқушысы Александр Лапкин мен «Умырзая» татар-башқұрт этномәдени орталығының өкілі Айлана Аменова бөлісті.
Үздік үштікті Суриана Джанаева, «Вайнах» шешен-ингуш этномәдени орталығы, «Понтос» грек орталығынан Мария Григориади және Т. Шевченко атындағы «Рідне слово» украин этномәдени орталығының жетекшісі Ирина Салагина түйіндеді.
Байқау жүлдегерлері дипломдармен және ақшалай сертификаттармен марапатталды.
Әдебиет БЕЛГІБАЙҰЛЫ,
Қарағанды облысы