Нәтижесінде, жоспарлы жұмыс жүйесін таппай, жарым жолда қалған.
Тараз қаласы әкімінің аппарат басшысы Айбек Тасеменовтың айтуынша, жыл басынан бері шаһар басшысы тарапынан 281 хаттамалық тапсырма келіп түскен екен. Жауаптылар осындағы 13 тапсырманы орындауда салғырттық танытқан.
– Берілген ескертпелерге қарамастан бүгінде қала әкімдігінің бөлімдері тарапынан тапсырмаларды мерзімінде орындамау, мерзімін ұзарту немесе мәлімет ұсынбау фактілері байқалады. Сондай-ақ орындалды деп ұсынылған тапсырмалар бойынша қала әкімі аппараты қызметкерлерінің жергілікті жерге шығып зерделеу барысында тапсырманың орындалмағаны анықталды. Мәселен, қала әкімдігінің Кәсіпкерлік, өнеркәсіп және туризм бөліміне «Зарина» сауда орталығының жанында пилоттық жоба ретінде соғылған аялдаманы 6 наурызға дейін алу туралы тапсырма берілген. Бөлім тарапынан аялдама иесі Ғ. Айбасовқа сауда павильонын алып тастау жөнінде қатынас хаты жолданып, иесімен жұмыстар жүргізіліп, Ғ. Айбасов аялдаманы алып тастауға уәде бергені туралы қызметтік жазба ұсынылған. Тапсырманың толық орындалуын қарау барысында аялдама алынбағаны анықталды. Яғни, тек хат алмасумен шектеліп, бөлім тарапынан тапсырма толық орындалмаған, – деді аппарат басшысы.
Сол секілді қала әкімдігінің сәулет және қала құрылысы бөлімі, қала әкімдігінің тұрғын жай-коммуналдық шаруашылық, жолаушылар көлігі және автомобильдер жолдары бөлімінің қызметкерлері де жауапты қызметіне жүрдім-бардым қарайды екен. Аталған бөлімдерге Тараз қаласының әкімі «Даңқ» аллеясына аттракциондар орнатуға тыйым салу туралы тапсырма берген. Сондай-ақ «Жеңіс» саябағындағы заңсыз орналастырылған сауда нүктелері мен аттракциондарды 13 наурызға дейін шығару және қала аумағындағы саябақтарда көктем-жаз мезгілдеріне дайындық шараларын ұйымдастыру жұмыстары бойынша берілген тапсырма да айтылған жерінде қалған.
Тараз қаласы әкімдігінің мәдениет және тілдерді дамыту, кәсіпкерлік, өнеркәсіп және туризм бөлімі, сәулет және қала құрылысы бөлімі мен қала әкімдігінің тұрғын жай-коммуналдық шаруашылық, жолаушылар көлігі және автомобильдер жолдары бөліміне жарнама парақшаларын орналастыруға тиісті орын белгілеу тапсырылған екен. Алайда бөлімдер қала әкімінің хаттамалық тапсырмасын орындауға ниет танытпаған.
Бұдан бөлек, Айбек Жаханбайұлы мемлекеттік қызметшілердің әдеп нормасын сақтамайтынын, қызметтік киім үлгілері талапқа сай келмейтінін сын тезіне алды. Сондай-ақ әкімдікке қарасты бөлімдердің қызметтік хаттарындағы орфографиялық қателіктерден көз сүрінеді екен.
Шаһар басшысы Бақытжан Орынбеков қала әкімдігінде өткен жиында мұндай олқылыққа жол берген басшылардың басынан сипамады. Әрқайсысынан жеке-жеке жауап алып, «сыбағасын» сөгіспен берді. Ал әлеуметтік желіні шулатқан жамбылдық 4 мектеп оқушысын соғыс өрті тұтанып жатқан Қырымға жарысқа жіберген қалалық білім бөлімі басшысының орынбасарын немесе жауапты маманын қызметтен босату туралы ұсыныс беруді тапсырды.
Жиында қала әкімінің кеңесшісі Дәулет Төлендіұлы да баяндама жасап, округтегі олқылықтарды тізіп шықты. Онда негізгі мәселе тұрмыстық қалдықтардың дер кезінде шығарылмауы мен жеке секторлардағы құрылыс жұмыстарының талапқа сай жүргізілмеуіне байланысты болды. Округ инспекторларының жұмысы да қала әкімі тарапынан оң бағаланбады. Бақытжан Әмірбекұлы округ әкімқараларына соңғы мүмкіндік беріп, бірқатарын жұмыстан босату туралы ұсыныс енгізді.
Қысқасы, тағайындалғанына жарты жылдан асқан қала әкімі қаһарына мінгендей. Сөгісті қарша боратып, бірқатар бөлім басшысын қызметінен босататынын да ашып айтты. Оған негіз де жоқ емес. Естеріңізде болса, осыдан бірер апта бұрын қала әкімдігінің Кәсіпкерлік және өнеркәсіп бөлімінің басшысы Айдын Алтай сауда орнынан iPhone ұялы телефонын мекеме атынан жаздырып алып, ақшасын төлемей елді шулатқан болатын. Соңғы кезде осы сынды әңгімелер қала әкімдігінің дәліздерінде жиі айтыла бастады. Демек, шаһардың бас ғимаратына қарасты мекемелер үлкен өзгерістің алдында тұр. Ал ол өзгерістердің нәтижесі қалай болары уақыт еншісіндегі дүние.
Саятхан САТЫЛҒАН,
Жамбыл облысы